პრეზიდენტ, დონალდ ტრამპისგან განსხვავებით ვიცე-პრეზიდენტი მაიკ პენსი მომავალი პრეზიდენტის, ჯო ბაიდენის ინაუგურაციას დაესწრება. ინფორმაციას CNN წყაროზე დაყრდნობით ავრცელებს. გამოცემის ცნობით, პენსი ღონისძიებაზე დასწრებას აპირებდა, თუმცა მოსაწვევს ელოდებოდა.

მას შემდეგ რაც ტრამპის მხარდამჭერები კაპიტოლიუმში შეიჭრნენ, პრეზიდენტმა განაცხადა, რომ ინაუგურაციაზე დასწრებას არ აპირებს.

როგორც CNN წერს, ტრამპი და მისი მხარდამჭერები ვიცე-პრეზიდენტზე ზეწოლას ახდენდნენ, რათა კონგრესში არჩევნების შედეგების დამტკიცებისთვის ხელი შეეშალა, თუმცა პენსმა განაცხადა, რომ ეს მის ძალებში არაა.

ჯო ბაიდენმა პრესკონფერენციაზე თქვა, რომ ინაუგურაციაზე პენსის ხილვა გაუხარდება. რაც შეეხება მოქმედ პრეზიდენტს, ბაიდენმა აღნიშნა, რომ ეს ის იშვიათი შემთხვევაა, როცა ტრამპს რაიმეში ეთანხმება:

"კარგია, რომ არ გამოჩნდება. მან ჩემს ყველაზე ცუდ მოლოდინებსაც გადააჭარბა".

კაპიტოლიუმში მოწყობილი არეულობის გამო დემოკრატიული პარტიის წარმომადგენლები დონალდ ტრამპს ადანაშაულებენ და აცხადებენ, რომ სწორედ მან უბიძგა საკუთარ მხარდამჭერებს კონგრესში სხდომა ჩაეშალათ. წარმომადგენელთა პალატის სპიკერმა, ნენსი პელოსიმ თანამდებობიდან ტრამპის გადაყენება მოითხოვა. როგორც ინფორმაცია ვრცელდება, დემოკრატი კანონმდებლები პრეზიდენტის იმპიჩმენტის დასაწყებად საბუთებს ამზადებენ.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ხუთი ადამიანი გარდაიცვალა. ერთ-ერთ ქალს კაპიტოლიუმში პოლიციამ შეჭრის დროს ესროლა.

გარდა ამისა, პრეზიდენტ დონალდ ტრამპის ტვიტერის ანგარიში 12 საათით დაიბლოკა. კომპანიაში განაცხადეს, რომ მიზეზი სამომხმარებლო წესების დარღვევა და ძალადობის წამახალისებელი ტვიტებია და დაამატეს, რომ თუ ტრამპი აღნიშნულ პოსტებს არ წაშლიდა, ანგარიშს განმეორებით დაბლოკავდნენ.

ტრამპის ანგარიშის აღდგენიდან რამდენიმე საათში კი ტვიტერმა ის თავის პლატფორმაზე სამუდამოდ დაბლოკა. ამასთან, მისი საპრეზიდენტო ვადის ბოლომდე, 20 იანვრამდე პრეზიდენტის ანგარიშები დაბლოკილია ფეისბუქისა და ინსტაგრამის პლატფორმებზე.

მხარდამჭერების მიერ ორგანიზებული არეულობის მიუხედავად, 7 იანვარს, აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება.

გაიგეთ მეტი: