დღეს, 8 იანვარს მოქალაქეებმა მსვლელობით გააპროტესტეს ამნისტიის ახალი კანონპროექტი. აქციის მონაწილეები ამნისტიის მუხლების გაფართოებას მოითხივენ, რომელიც უფრო მეტ ადამიანს შეეხება.

"გაუფრთხილებლობით დანაშაულზე გაფართოვდეს იმ მუხლების სია, რომელიც არის და თუ დაზარალებული არის ყველა გაუფრთხილებლობით დამნაშვე გათავისუფლდეს და მძიმე და განსაკუთრებით მძიმე დანაშულებზე, გარდა ისეთ დანაშაულზე, რომელიც არის ქურდული სამყაროს წევრობა, ან ტერორიზმის მსგავსი ტიპის დანაშაულის გარდა, ვითხოვთ, რომ რაღაც მცირედით შეღავათი მიეცეთ ამ ადამიანებს", — ამბობს უფლებადამცველი ალექსანდრე კაპანაძე ფორმულასთან.

სამოქალაქო აქტივისტის, ელენე ხოშტარიას თქმით, დიდი ოდენობით ნარკოდამნაშვეების გათავისუფლება და კლუბურ ნარკოტიკზე პატიმრების ციხეში დატოვება არის გაუგებარი. გარდა ამისა, ელენე ხოშტარია მთავარი არხის მეწილეზე, გიორგი რურუაზეც საუბრობს.

"უბრალოდ გაუგებარია, დიდი ოდენობით ნარკოტიკზე ვიღაცა გამოუშვა და კლუბურ ნარკოტიკზე ადამიანი დატოვო. იგივე არის რურუას შემთხვევაშიც, სპეციალურად, რომ რურუა არ გამოვიდეს, ის მუხლი არ არის შეყვანილი და ამის გამო, მათ შორის, იჩაგრება უამრავი ადამიანი", — ამბობს ელენე ხოშტარია ფორმულასთან.

ადამიანის უფლებათა კომიტეტის თავმჯდომარე, მიხეილ საერჯველაძე ამბობს, რომ აქციის მონაწილეები ცდილობენ ამნისტიის ინიცატივის პოლიტიკურ ვალდებულებებთან დაკავშირებას, რაც მისი აზრით, არასწორია.

"დააკავშირონ ეს ამნისტია და ეს ინიციატივა გარკვეულ პოლიტიკურ რაღაც ვალდებულებებს, ეს არ არის სწორი, ეს აბსოლუტურად მოკლებულია საფუძველს", — აცხადებს მიხეილ სარჯველაძე.

პარლამენტში დააინიცირეს საქართველოს კანონის პროექტი ამნისტიის შესახებ, რომლის მიხედვითაც ამინისტია შეეხება სულ 44 მუხლით გათვალისწინებულ დანაშაულს. ამ დროისთვის კანონპროექტი არ მოიცავს ისეთ მძიმე მუხლებს, როგორიცაა მკვლელობა, ოჯახში ძალადობა და ასე შემდეგ.

ასევე, კანონპროექტი ითვალისწინებს იმ პირთა განთავისუფლებას სისხლის სამართლის პასუხისმგებლობისგან და შესაბამისი სასჯელისგან, რომელთაც 2020 წლის 11 დეკემბრამდე ჩაიდინეს ამ კანონპროექტით გათვალისწინებული ცალკეული დანაშაული.