შინაგან საქმეთა სამინისტროს ინფორმაციით ცაგერში დააკავეს კაცი, რომელმაც შვილს ნაჯახით ხელზე დაზიანება მიაყენა.

უწყების ინფორმაციით, პირს ცაგერის რაიონულმა სასამართლომ აღკვეთის ღონისძიების სახით 4 000 ლარი გირაო შეუფარდა. იმავე დღეს მის მიმართ შემაკავებელი ორდერი გამოიცა და ძალადობის განმეორების თავიდან აცილების მიზნით, ელექტრონული სამაჯური დაუმაგრდა.

ელექტრონული ზედამხედველობისთვის თავის არიდება საქართველოს სისხლის სამართლის კოდექსით განსაზღვრულ პასუხისმგებლობას ითვალისწინებს.

შსს-ს ცნობით, საქმეზე გამოძიება საქართველოს სისხლის სამართლის კოდექსის 126-ე პრიმა მუხლის 1-ლი ნაწილით მიმდინარეობს, რაც გულისხმობს, ოჯახის ერთი წევრის მიერ ოჯახის სხვა წევრის მიმართ ძალადობა, სისტემატური შეურაცხყოფა, შანტაჟი ან დამცირება, რამაც გამოიწვია ფიზიკური ტკივილი ან ტანჯვა და რასაც არ მოჰყოლია ამ კოდექსის 117-ე, 118-ე ან 120-ე მუხლით გათვალისწინებული შედეგი.