ჯანდაცვის მინისტრის მოადგილის თამარ გაბუნიას თქმით, ქვეყანაში კორონავირუსის პიკი თითქოს უკან დარჩა, მაგრამ ეს რამდენად სტაბილური იქნება შეზღუდვების მოხსნის შემდეგ ამაზეა ფიქრი ჯერ ადრეა. მან, ასევე, აღნიშნა რომ ძალიან ფრთხილად უნდა ვიყოთ და არ უნდა ვიჩქაროთ შეზღუდვების ბოლომდე მოხსნა. ამის შესახებ მან პალიტრანიუსის ეთერში განაცხადა.

"ჩვენ მივიღეთ სტაბილიზაცია შეზღუდვების ფონზე. დღეს იყო 2000 შემთხვევა, თუმცა ეს 2000 შემთხვევაც ჩვენნაირი ქვეყნისთვის არ არის ცოტა. კარგია ის, რომ მცირდება შემთხვევების რაოდენობა და არ ვსაუბრობთ 4 ათას შემთხვევაზე და შემთხვევების რაოდენობა განახევრდა, პრაქტიკულად, იმ შეზღუდვების ფონზე, რომელიც ბოლო პერიოდში დაწესდა. ჯერჯერობით ძალიან ფრთხილად უნდა ვიყოთ და არ უნდა ვიჩქაროთ შეზღუდვების ბოლომდე მოხსნა და სწორედ ამას ემსახურება შემდეგი ერთი თვე. ციფრებს, როდესაც შევხედავთ, პიკი კი თითქოს უკან დარჩა, მაგრამ ეს რამდენად რეალურად სტაბილურად შენარჩუნდება მას შემდეგ, რაც შეზღუდვები მოიხსნება, ცოტა ადრეა ამაზე საუბარი", — ამბობს გაბუნია.

29 დეკემბრის მონაცემებით, ბოლო 24 საათის განმავლობაში გამოვლენილია ვირუსით ინფიცირების 2 012 ახალი დადასტურებული შემთხვევა. ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 224 155-ს.