პარლამენტის რიგგარეშ სესიის პლენარულ სხდომაზე საგარეო ურთიერთობათა კომიტეტის თავმჯდომარემ, ნიკოლოზ სამხარაძემ იმ პირველ პროექტზე ისაუბრა, რომელიც მე-10 მოწვევის პარლამენტში დაინიცირდა.

პროექტი ეხება რეზოლუციას საგარეო პოლიტიკის შესახებ. აღნიშნული პროექტი დღეს უკვე განიხილეს ევროპასთან ინტეგრაციისა და საგარეო ურთიერთობათა კომიტეტზე. სწორედ ამ განხილვის შემდეგ, როგორც სამხარაძემ აღნიშნა, რეზოლუციას დაემატა ერთი პუნქტი და ის გულისხმობს, რომ საქართველო გააგრძელებს რუსეთის ფედერაციის წინააღმდეგ წარმოებულ საერთაშორისო დავას, ამაზე აქტიურ მუშაობას, სანამ საბოლოო წარმატება არ იქნება მიღწეული.

"რეზოლუციის პირველი პუნქტი ითვალისწინებს საქართველოს ტერიტორიული მთლიანობის აღდგენას საერთაშორისო პარტნიორების მხარდაჭერით. მეორე, ეს არის, რომ 2024 წლისთვის ქვეყანა უნდა მომზადებულიყო იმისთვის, რომ ევროკავშირში წევრობაზე განაცხადი გაეკეთებინა, შესაბამისად ეს რეზოლუცია დაავალებს ხელისუფლების ყველა შტოს, იმუშაოს იმისთვის, რომ 2024 წელს ეს პროგრამული დაპირება ახდეს და რეალობად გადაიქცეს. მესამე პუნქტი ამბობს, რომ ნატო ქვეყნისთვის უალტერნატივო სივრცეა და ხელისუფლებას ავალებს, მოამზადოს ქვეყანა ამისთვის", — განაცხადა ნიკოლოზ სამხარაძემ.

რაც შეეხება დანარჩენ პუნქტებს, ნიკოლოზ სამხარაძემ ისინი მოკლედ განიხილა:

• "აშშ-სთან გვაქვს სტრატეგიული პარტნიორობის ქარტია. სწორედ ამ ქარტიის სრულად ამოქმედებასა და გაღრმავებას ავალებს რეზოლუცია ხელისუფლებას, მათ შორის, აშშ-ს მეტ ჩართულობას შავი ზღვის უსაფრთხოების საკითხებში. გარდა სხვა საკითხებისა, პრიორიტეტული მიმართულებაა ამერიკული ინვესტიციების ზრდა საქართველოში;
• სამხრეთ კავკასიისა და შავი ზღვის რეგიონი ასევე პრიორიტეტულია. მომდევნო ოთხი წლის განმავლობაში თურქეთთან, აზერბაიჯანთან და სომხეთთან ურთიერთობის გაღრმავება იქნება პრიორიტეტი;
• რაც შეეხება ჩვენს მთავარ გამოწვევა რუსეთის ფედერაციასთან ურთიერთობას — საქართველო გააგრძელებს რუსეთთან პრაგმატული და პრინციპული პოლიტიკის წარმოებას. ამ პოლიტიკის ნომერ პირველი ამოცანა არის ოკუპაციის დასრულება და რეგიონში უსაფრთხოებისა და სტაბილურობის განმტკიცება;
• ჩვენთვის მნიშვნელოვანია არა მხოლოდ ევროპის, მეზობელი ქვეყნებისა და აშშ-სთან ურთიერთობა, არამედ აღმოსავლეთის ქვეყნებთან. პრიორიტეტი იქნება ამ მიმართულებითაც ურთიერთობის გაღრმავება;
• საქართველო გააგრძელებს ნატოსა და ევროკავშირის მისიებში მონაწილეობის მიღებას. ასევე, აქტიურად ჩაერთვება იმ გლობალური გამოწვევის წინააღმდეგ ბრძოლაში, რაც მსოფლიოს აწუხებს;
• გვყავს ასობით ათასი მოქალაქე, რომელიც საზღვარგარეთ ცხოვრობს და ისინი, ვინც არ არიან მოქალაქეები და მაგრამ ჩვენი თანამემამულეები არიან. მათთვის ყურადღების მიქცევა იქნება პრიორიტეტი;
• საგარეო პოლიტიკის წარმოებაში აუცილებელია სამოქალაქო საზოგადოების აქტიური ჩართულობა", — აღნიშნა ნიკოლოზ სამხარაძემ.

სამხარაძემ აღნიშნა ისიც, რომ პარლამენტი, როგორც ორგანო, რომელიც განსაზღვრავს საგარეო პოლიტიკის ძირითად მიმართულებებს, გამოიყენებს რეგლამენტით მინიჭებულ ახალ ბერკეტებს და გაუწევს ეფექტიან ზედამხედველობას საქართველოს მთავრობას იმისთვის, რომ ეს გეგმები, რომლებიც დასახულია რეზოლუციაში, შესრულდეს მომავალი ოთხი წლის განმავლობაში.

24 დეკემბერს მე-10 მოწვევის ერთპარტიული პარლამენტის რიგგარეშე სესიის პლენარული სხდომა გაიმართა, სადაც პრემიერმინისტრობის კანდიდატმა, გიორგი გახარიამ მომავალი მთავრობის პროგრამა წარადგინა. ასევე, გუშინ დამტკიცდა მინისტრთა კაბინეტი, რომლის ყველა წარმომადგენელი ქართული ოცნების წევრია.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.