საქართველოს შინაგან საქმეთა სამინისტროს ინფორმაციით, დაკარგული სამხედრო მოსამსახურე თბილისში იპოვეს. უწყებაში ამბობენ, რომ ის თავს კარგად გრძნობს და გამოკითხვის მიზნით პოლიციის განყოფილებაშია გადაყვანილი.

შსს-ს ინფორმაციით, გამოძიება საქართველოს სისხლის სამართლის კოდექსის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.

თავდაცვის სამინისტრომ სამხედრო მოსამსახურის დაკარგვის შესახებ ინფორმაცია გუშინ, 23 დეკემბერს გაავრცელა. უწყების განცხადებით, საკონტრაქტო სამხედრო მოსამსახურე 21 დეკემბერს 09:00 სთ-მდე იმყოფებოდა განწესში და დაკისრებულ მოვალეობას ასრულებდა, ხოლო განწესის შეცვლის შემდეგ კონტრაქტით გათვალისწინებული დათხოვნის უფლებით ისარგებლა და სამხედრო ნაწილის ტერიტორია დატოვა, 22 დეკემბერს კი სამხედრო ნაწილში არ გამოცხადდა, რის შესახებაც მის ოჯახის წევრებსაც აცნობეს.