ქართული ოცნების დეპუტატისა და იუსტიციის ყოფილი მინისტრის, თეა წულუკიანის განცხადებით, რამდენადაც მას სმენია, საქართველოში შემოსული რუსი ჟურნალისტი, მაქსიმ შევჩენკო პუტინის რუსეთისადმი კრიტიკულად განწყობილია.

"მიუხედავად იმისა, რომ რუსული საკმაოდ კარგად ვიცი, არ დაგიმალავთ და რუსულ მედიას თვალს არ ვადევნებ. აქედან გამომდინარე, ამ ჟურნალისტის საქმიანობის დეტალები არ ვიცი, მაგრამ ერთი რამ, რაც კი მომისმენია, არის ის, რომ ის, რამდენადაც ეს რუსეთის ფედერაციაში შესაძლებელია, პუტინისადმი და მისი მისი მმართველობის სტილისა და რეჟიმისადმი კრიტიკას აჟღერებს. შესაბამისად, ასეთი ჟურნალისტი თუ შემოდის საქართველოში, ამის გარშემო ატეხილი ამ ხარისხის აჟიოტაჟი, არ ვიცი რას ეფუძნება", — განაცხადა წულუკიანმა.

მისივე თქმით, რუს ჟურნალისტს არათუ ოკუპაციის შესახებ კანონი არ დაურღვევია, არამედ საზღვრის გადმოკვეთისას არ დარღვეულა არც სხვა კანონი. წულუკიანი ამბობს, რომ წინააღმდეგ შემთხვევაში, მას დააკავებდნენ.

რუსი ჟურნალისტი, მაქსიმ შევჩენკო ამბობს, რომ საქართველოში ხელისუფლების მოწვევით იმყოფებოდა. თავდაპირველად, ქართულ ოცნებაში განაცხადეს, რომ არ იციან, ვინ არის მაქსიმ შევჩენკო და არც ის იციან, რა მიზნით იმყოფებოდა საქართველოში. მოგვიანებით, მმართველი გუნდის დეპუტატმა, ბექა დავითულიანმა თქვა, რომ რუსი ჟურნალისტი საქართველოში ბიზნესმოწვევით იმყოფებოდა. ამავდროულად, ქართული ოცნების წარმომადგენლები საუბრობენ იმაზე, რომ შევჩენკო ვლადიმერ პუტინის ერთ-ერთი "ყველაზე სერიოზული" მოწინააღმდეგეა.