ერთიანი ნაციონალური მოძრაობის თავმჯდომარეს ფეისბუქით აირჩევენ. ინფორმაცია ამის შესახებ პარტიის ფეისბუქგვერდზე გამოქვეყნდა.

"პოლიტიკურმა საბჭომ მიიღო გადაწყვეტილება დანერგოს პარტიის თავმჯდომარის შერჩევის ელექტრონული მეთოდი.

პარტიის თავმჯდომარედ წარდგენილია ორი კანდიდატი — ლევან ვარშალომიძე და ნიკა მელია.

ხმის მიცემის უფლება აქვს ყველა იმ პირს, რომლებსაც კენჭისყრის დაწყების მომენტისათვის ენმ-ის ოფიციალური ფეისბუქ გვერდი მოწონებული ან/და გამოწერილი აქვთ.

კენჭისყრა დაიწყება 21 დეკემბრის 14:00 სთ-ზე და გაგრძელდება 25 დეკემბრის 21:00 სთ-მდე", — წერია პოსტში.

როგორც პარტიაში აცხადებენ, ფეისბუქით ხმის მიცემის შემდეგ, 25 დეკემბერს პარტიის ყრილობა გაიმართება და საბოლოოდ გადაწყდება, ვის აირჩევენ თავმჯდომარედ. პარტიაში, ასევე, აცხადებენ, რომ ამომრჩევლის ნების წინააღმდეგ არ წავლენ და თავმჯდომარედ დამტკიცდება ის, ვისაც ფეისბუქგამოკითხვით მეტი ხმა ექნება.

"ჩვენი ქვეყნის ისტორიაში პარტიის თავმჯდომარის ყველაზე გამჭვირვალე არჩევა მოხდება, ელექტრონულად. ათი ათასობით პარტიის მხარდამჭერს და ასევე, პარტიის წევრებს ამ არჩევნებში მონაწილეობის შესაძლებლობა ექნებათ", — განაცხადა ენმ-ის ერთ-ერთმა ლიდერმა, ზაალ უდუმაშვილმა TV პირველთან.

ენმ-ს პარტიის თავმჯდომარის პოსტი ვაკანტური მას შემდეგ გახდა, რაც ნაციონალური მოძრაობის თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისივე თქმით, მისთვის კიდევ უფრო მიუღებელია პარტიული სტრატეგიის არარსებობა. ეს კი მხოლოდ ქართულ ოცნებას აძლევს ხელს.

გაიგეთ მეტი: