ნაციონალური მოძრაობის ლიდერის, სალომე სამადაშვილის თქმით, გრიგოლ ვაშაძე, სავარაუდოდ, პოლიტიკურ საქმიანობას აღარ გააგრძელებს. ამის შესახებ მან რუსთავი 2-ის ეთერში ისაუბრა.

"გრიგოლ ვაშაძემ ერთ-ერთ ინტერვიუში თქვა, რომ ეს იყო მისი ბოლო არჩევნები და ის აღარ აპირებდა არჩევნებში მონაწილეობის მიღებას. ეს იყო მისი მხრიდან გზავნილი, რომ ემზადებოდა იმისთვის, რომ ამ ეტაპზე აღარ გაეგრძელებინა პოლიტიკური საქმიანობა," - განაცხადა სამადაშვილმა.

ნაციონალური მოძრაობის თავმჯდომარემ, გრიგოლ ვაშაძემ პარტია დატოვა. ამის შესახებ მან Facebook-ზე დაწერა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისთვის კიდევ უფრო მიუღებელია პარტიული სტრატეგიის არარსებობა. ეს მხოლოდ ე.წ. ქართულ ოცნებას აძლევს ხელს. მისივე თქმით, ვერ შეეგუება იმას, რომ პარტიის გარშემო და მის შიგნითაც გამოჩნდნენ ისეთი ოდიოზური ფიგურები, რომლებიც კარგა ხანია თითქოს და ჩააბარეს წარსულს, და რომლებთან ერთად ვერასდროს, იმეგობრებს, მანვე აღნიშნა ,რომ ასე ვერასდროს ვერ მოიპოვებენ ამომრჩევლის ნდობას.