იუსტიციის ყოფილი მინისტრი და ახლა უკვე მე-10 მოწვევის პარლამენტის დეპუტატი ქართული ოცნებიდან, თეა წულუკიანი აცხადებს, გრიგოლ ვაშაძის პოზიციები ყოველთვის იყო ნაკარნახევი იმით, რა სჯობს ქვეყნისთვის და არა ვიწრო პარტიული ინტერესებით. წულუკიანის თქმით, ვაშაძე 8 მარტის მოლაპარაკებების დროს გაიცნო და ეს პირველი შემთხვევა არაა, როცა მას ასე ახასიათებს.

"იტყოდა ძალიან უსიამოვნოს რამეს ჩემი ყურებისთვის, ქართული ოცნების, მოსასმენად, მაგრამ, ეს იყო ნათქვამი რაღაცა ფორმით, ეს ყოველთვის იყო ნაკარნახევი თითქოს უფრო რაღაცა, არა ვიწრო პარტიულით, არამედ უფრო იმითი, თუ რა ჯობს ქვეყნისთვის. ეს ყოველთვის ასე იყო. რაც არ უნდა მე ის არ მომწონდეს, რაც არ უნდა ის სხვა, ჩემთვის აბსოლუტურად მიუღებელ ძალას წარმოადგენდეს, ეს ნამდვილად ასე იყო", — აცხადებს თეა წულუკიანი.

წულუკიანის თქმით, ვაშაძე ყოველთვის გამოირჩეოდა მწვავე კრიტიკით და პრინციპულობით, მაგრამ, ის საკუთარი პოზიციის გამოსახატავად არჩევდა ისეთ ფორმას, რაც იშვიათად დაუნახავს სხვა ოპოზიციონერ ლიდერებში.

"ბატონი გრიგოლი ყოველთვის იყო მწვავე, ყოველთვის იყო პრინციპული, მაგრამ, მის ყოველ კრიტიკას, მწვავე კრიტიკას, ქართული ოცნების ქარცეცხლში გატარებას და რავიცი, რა დავარქვა კიდევ, ყოველთვის გასდევდა ხოლმე თან ის რაღაცა, რაც იშვიათად დამინახავს სხვა ოპოზიციის წევრებში", — ამბობს წულუკიანი.

დღეს, 15 დეკემბერს, გრიგოლ ვაშაძემ საკუთარ ფეისბუქ გვერდზე დაწერა, რომ ტოვებს ნაციონალურ მოძრაობას.

გაიგეთ მეტი: