პრემიერმინისტრის, გიორგი გახარიას განცხადებით, იუსტიციის მინისტრობის კანდიდატი, გოჩა ლორთქიფანიძე, რომელიც ჰააგის სისხლის სასამართლოს მოსამართლედ აირჩიეს, რამდენიმე თვეში შეუდგება საქმიანობას, მანამდე კი გუნდში გააგრძელებს საქმიანობას. ფეისბუქზე გამოქვეყნებულ პოსტში გახარია არ აკონკრეტებს, იქნება თუ არა ის მანამდე იუსტიციის მინისტრი, თუ მთავრობის დამტკიცებამდე მის კანდიდატურას შეცვლიან.

"ბატონი გოჩა რამდენიმე თვეში შეუდგება ამ საპატიო და ამავე დროს ძალიან საპასუხისმგებლო უფლებამოსილების შესრულებას, მანამდე კი, ჩვენს გუნდში გააგრძელებს საქმიანობას და ჩვენი ქვეყნისათვის მნიშვნელოვანი საქმეების კეთებას", — წერს ის.

გახარიას თქმით, ამაყია ამ მიღწევით და დარწმუნებულია, რომ ლორთქიფანიძე უმაღლესი ერთ-ერთი საუკეთესო მოსამართლე იქნება სისხლის სამართლის საერთაშორისო სასამართლოში.

იუსტიციის მინისტრის მოვალეობის შემსრულებელი და ამავე უწყების მინისტრობის კანდიდატი, გოჩა ლორთქიფანიძე დღეს, 19 დეკემბერს სისხლის სამართლის საერთაშორისო სასამართლოს (ICC) მოსამართლედ აირჩიეს 2021-2030 წლების ვადით. გუშინ, 18 დეკემბერს კი გახარიამ მთავრობის შემადგენლობის ახალი სია წარადგინა, რომელშიც ლორთქიფანიძე იუსტიციის მინისტრობის კანდიდატია.

ოპოზიციაში აცხადებენ, რომ ეს აჩვენებს, რამდენად დისკომუნიკაციაა მთავრობაში და ისინი არაპროფესიონალები არიან.