ჯანმრთელობის მსოფლიო ორგანიზაციის ევროპის რეგიონული დირექტორის, ჰანს კლუგეს განცხადებით, პანდემიის პირობებში, პირველ რიგში, ვირუსის დასათრგუნად უნდა გატარდეს ზომები, თუმცა ასევე საყურადღებოა ადამიანების მენტალური ძალადობა, ოჯახური ძალადობის გაზრდილი შემთხვევები და სხვა.

"მარტში ჩვენ ვცდილობდით ვირუსის გავრცელების შეჩერებას და ხალხის გადარჩენას. დღეს ყოველივე ამის შესახებ მეტი ცოდნა გვაქვს, შეგვიძლია ვმართოთ, თავი დავიცვათ ვირუსის სწრაფი გავრცელებისგან და ამით დავიცვათ მოსახლეობა. მაგრამ ეს ბალანსი არის ძალიან დელიკატური. პირველ რიგში, ჩვენ, რა თქმა უნდა, უნდა გავატაროთ ზომები, რომ დავთრგუნოთ და შევწყვიტოთ ვირუსი, მაგრამ ასევე, უნდა ვიფიქროთ ადამიანების მენტალურ ჯანმრთელობაზე, ოჯახში ძალადობის გაზრდილ ფაქტებზე, ადამიანები კარგავენ შემოსავალს შეზღუდული შესაძლებლობების მქონე ბავშვები, რომლებიც ვერ იღებენ დახმარებას ციფრული ტექნოლოგიების საშუალებით და სხვა დაავადებები მქონე პაციენტები, დავუშვათ ონკოლოგიური პაციენტები. მინდა გითხრათ, რომ აქ არ არსებობს სწორი ან არასწორი მიდგომა, ამიტომ ვამბობ, რომ ეს არის ძალიან დელიკატური ბალანსი, რომელიც უნდა იყოს დაცული შესაბამისი მეცნიერული მონაცემების საფუძველზე, რაც მგონი კეთდება საქართველოში", — განაცხადა კლუგემ.

აღნიშნული განცხადება ჯანმრთელობის მსოფლიო ორგანიზაციის ევროპის რეგიონულმა დირექტორმა ჯანდაცვის მინისტრის მოვალეობის შემსრულებელთან, ეკატერინე ტიკარაძესთან ერთად გამართულ ბრიფინგზე გააკეთა.

18-22 დეკემბერს საქართველოს ჯანმრთელობის მსოფლიო ორგანიზაციის (WHO) ევროპის რეგიონული ოფისის დირექტორი, ჰანს კლუგე სტუმრობს. ოფიციალური ვიზიტის მასპინძელი საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროა. ვიზიტ დროს ძირითადად ორი საკითხი განიხილება — ჯანმრთელობის მსოფლიო ორგანიზაციის წარმომადგენლობის გაძლიერება საქართველოში, ქვეყნის მხარდაჭერა ევროკავშირთან და სხვა მსხვილ დონორებთან კონსოლიდირებული სტრატეგიული პარტნიორობის გზით და Covid-19-ით გამოწვეულ რეალობასთან გამკლავება, მისი გავლენა კანდაცვის სისტემებზე.