პარტია სამართლიანობის ლიდერმა, ეკა ბესელიამ განაცხადა, რომ მე-10 მოწვევის პარლამენტში ინიცირებული კანონის პროექტი ამნისტიის შესახებ კოჭლის შთაბეჭდილებას ტოვებს და მასში შესულია მკვდარი მუხლები. ამის შესახებ ბესელიამ TV პირველის ეთერში ისაუბრა.

"ამნისტიის შინაარსს თუ ჩახედავთ, გამახსენდა წინა ხელისუფლების დროის ამნისტია, სადაც ბევრი მკვდარი მუხლები იყო ჩაყრილი, რაოდენობრივად იზრდებოდა და რეალურად ის ადამიანების ძალიან მცირე ნაწილს ეხებოდა. ეს ამინისტია არ მიტოვებს განცდას, რომ სამართლიანად შეხება იმ ადამიანებს, ვინც უსამართლოდ იხდის სასჯელს. ვერ დავინახე, რატომ არის მაგალითად, ისეთი მკვდარი მუხლები, როგორიც არის უკანონო თევზჭერა, სახერხი მოწყობილობის უკანონოდ მონტაჟი და ა.შ. კი არ ვაკნინებ ამ მუხლებს, მაგრამ რაღაცნაირად ლოგიკა ვერ დავინახე. მეეჭვება, ამ მუხლებით იხდიდნენ ადამიანები სასჯელს, რადგან პრაქტიკაში, თითქმის, არ შემხვედრია ასეთი მუხლები. უმრავლეს მუხლებს აქვს ჯარიმა სანქციის სახით, ან 2-3 წლამდე თავისუფლების აღკვეთა. დამრჩა შთაბეჭდილება, რომ რაოდენობისთვის არის ჩამოწერილი ბევრი მუხლი", — განაცხადა ეკა ბესელიამ.

დღეს საქართველოს პარლამენტში ინიცირდა საქართველოს კანონის პროექტი ამნისტიის შესახებ, რომლის მიხედვითაც ამნისტია შეეხება სულ 44 მუხლით გათვალისწინებულ დანაშაულს და აქ არ შევა ისეთი მძიმე დანაშაულები, როგორიცაა მკვლელობა, ოჯახური ძალადობა და სხვა.