საქართველოს სახალხო დამცველი, უჩა ნანუაშვილი თეა წულუკიანის განცხადებას შეურაცხმყოფელს და გაუგებარს უწოდებს. იუსტიციის მინისტრის თქმით, სახალხო დამცველმა სტრასბურგში სხვადსხვა ქვეყნების წარმომადგენელებს მოუწოდა, რომ არ დაეჭირათ მხარი საქართველოს მიერ წარდგენილი კანდიდატებისთვის.

ობმუდსმენი წულუკიანისგან ინფორმაციის წყაროს დასახელებას ითხოვს და ამბობს, რომ სტრასბურგში, ევროსაბჭოს წარმომადგენლებთან არ უსაუბრია ისეთ საკითხებზე, რაზეც საჯაროდ არ საუბრობდა:

"პირდაპირ შეიძლება ითქვას, რომ ეს არის ცილისწამება, ან მან წარმოადგინოს ამის დამადასტურებელი საბუთი ასევე დაასახლოს ინფორმაციის წყარო, რომ თითქოს მე ჩავაგდე კონკრეტული სია და ქვეყნებს მოვუწოდებდი ამ სიის წინააღმდეგ. მეორე სახალხო დამცველმა მანამდე არაერთხელ აღნიშნა იმ ხარვეზების შესახებ, რომელიც ამ პროცესებში არსებობდა. საუბარია სწორედ მოსამართლეების შერჩევის პროცესში. მათ შორის ჩვენთვის იყო გაუგებარი, თუ რატომ მოხდა თუნდაც ერთი კანდიდატურის ჩანაცვლება მეორეთი, რომ მის ნაცვლად იქნა წარდგენილი დაბალი შეფასების მქონე კანდიდატი. პრობლემა და კითხვის ნიშნები ამ საკითხთან დაკავშირებით არაერთხელ დაისვა, თუმცა პასუხი დღემდე ვერ მივიღეთ. ზოგადად, ის, რომ სახალხო დამცველი არაერთ შეხვედრას მართავს, მათ შორის, რა თქმა უნდა, სტრასბურგშიც და ევროსაბჭოს წარმომადგენლებთან, სადაც, რა თქმა უნდა, არის ბევრ საკითხზე საუბარი და ჩვენ რაიმე განსაკუთრებული ამ შეხვედრების დროს, რაზეც საჯაროდ, ღიად არ ვსაუბრობთ, არ გვისაუბრია. აქედან გამომდინარე ეს შეფასება ჩემთვის არის შეურაცხმყოფელი და გაუგებარი."

ევროსაბჭოში 24 იანვარს გამართულ შეხვედრაზე საქართველოდან მოსამართლეები უნდა დაემტკიცებინათ, თუმცა, პროცესი ჩაიშალა, რის გამოც საქართველოს ხელისუფლებამ კონკურსი ხელახლა უნდა ჩაატაროს და ევროსაბჭოს ახალი სია წარუდგინოს.