ცენტრალური საარჩევნო კომისიის თავმჯდომარის, თამარ ჟვანიას 11 დეკემბრის განკარგულებით, პარტიების მიერ წარდგენილი წინასწარი წერილობითი თანხმობის საფუძველზე, სახელმწიფო ბიუჯეტიდან დაფინანსებას 12 ბარიერგადალახული პარტია მიიღებს.

დაფინანსებულ პარტიათა შორის არ იქნება მოქალაქეები და გირჩი, რადგან მათ ცესკოსთვის შესაბამისი განცხადებით არ მიუმართავთ.

პარტიების ყოველწლიური საბიუჯეტო დაფინანსება ასე გამოიყურება:

  • ქართული ოცნება-დემოკრატიული საქართველო — 5,140,020;
  • ერთიანი ნაციონალური მოძრაობა — 2,199,635;
  • მოძრაობა სახელმწიფო ხალხისთვის — 240,000;
  • პროგრესი და თავისუფლება — 12,000;
  • საქართველოს რესპუბლიკური პარტია — 204,000;
  • ევროპელი დემოკრატები — 460,000;
  • გიორგი ვაშაძე-სტრატეგია აღმაშენებელი — 939,925.35
  • კანონი და სამართალი — 104,436.15;
  • ევროპული საქართველო — მოძრაობა თავისუფლებისთვის — 1,124,409;
  • ლელო საქართველოსთვის — 803,560;
  • საქართველოს პატრიოტთა ალიანსი — 1,043,120;
  • საქართველოს ლეიბორისტული პარტია — 289,710.

12 პარტიის წლიური დაფინანსება სულ 12,560,815.50 ლარს შეადგენს.

განკარგულების თანახმად, მისი გასაჩივრება მიღებიდან 2 კალენდარული დღის ვადაშია შესაძლებელი.

11 დეკემბერს პარლამენტში მე-10 მოწვევის პარლამენტის სხდომა გაიმართა, რომელშიც მხოლოდ ქართულმა ოცნებამ მიიღო მონაწილეობა. სხდომაზე, ასევე, მიწვეული იყო პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი დაესწრო.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ. ამასთან, ოპოზიციამ ხელმოწერილი განცხადებები, სიის განულების მოთხოვნით, ცესკო-ში უკვე ჩააბარა.