ლელოს ლიდერის ბადრი ჯაფარიძის თქმით, დღევანდელი შეხვედრა ოპოზიციასა და ქართულ ოცნებას შორის სასარგებლო იყო. თუმცა იგი დეტალებზე არ საუბრობს, რადგან აღნიშნავს, რომ ეს მოლაპარაკებების ინტერესებიდან გამომდინარეობს.

"დღეს იყო ძალიან სასარგებლო შეხვედრა, განსხვავებები რჩება, მაგრამ ვფიქრობ, რომ ეს დრო ჩვენ ძალიან კარგად გამოვიყენეთ. არ გვაქვს შეთანხმება, რომ დეტალები გამოვიტანოთ გარეთ, ამიტომ კონკრეტულ კითხვებზე ვერ გავცემ პასუხს", — განაცხადა მან.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტი მიუღებელია. ამ ეტაპზე მოლაპარაკებების მესამე რაუნდის მოლოდინია.