კანონმდებლობა მნიშვნელოვან უპირატესობას ანიჭებს პერსონალური მონაცემების დაცვას საჯარო ინფორმაციის გაცემის ინტერესთან შედარებით, - ამის შესახებ ისაუბრეს ინფორმაციის თავისუფლების განვითარების ინსტიტუტის (IDFI) მიერ სასამართლო გადაწყვეტილებების ხელმისაწვდომობის გაზრდასთან დაკავშირებით გამართულ დასკვნით პრეზენტაციაზე.

ორგანიზაციის მიერ ჩატარებული კვლევის მიხედვით, კანონმდებლობა არ ითვალისწინებს საჯარო ინტერესს ზოგიერთი საქმის შემთხვევაში და არ ასაჯაროებს ღია სასამართლოს სხდომაზე მიღებულ გადაწყვეტილებებს. გარდა ამისა, IDFI-ში აღნიშნავენ, რომ სასამართლოები არ გასცემენ ყოფილ მაღალ თანამდებობის პირთა შესახებ მიღებულ გადაწყვეტილებებს და საერთო სასამართლოებში, სავარაუდოდ, კვლავ არსებობს სასამართლოს გადაწყვეტილების გაცემაზე უარის თქმის შეთანხმებული შაბლონური ფორმები.

როგორც ორგანიზაციაში განმარტავენ, არსებული პრაქტიკის გაუმჯობესებისა და სასამართლო გადაწყვეტილებებზე ხელმისაწვდომობის გაზრდის მიზნით, IDFI-მ შეისწავლა სასამართლოების მიერ გადაწყვეტილებების გაცემის პრაქტიკა.

IDFI კანონისა და დემოკრატიისა ცენტრის აღმასრულებელი დირექტორი (კანადა) ტობი მენდელის რეკომენდაციებსაც ავრცელებს საქართველოში სასამართლო გადაწყვეტილებათა ხელმისაწვდომობის გასაზრდელად. უცვლელი სახით გთავაზობთ ტობი მენდელის რეკომენდაციებს:

  • დაცვის საგანი არის პირადი ცხოვრების ხელშეუხებლობა და არა პერსონალური მონაცემები (ორი სრულიად განსხვავებული მიზანი და მასშტაბი);
  • საერთაშორისო სასამართლოების მიერ ჩამოყალიბებულია სპეციალური კრიტერიუმები, რომლებიც ამ ორი ინტერესის დაბალანსებას ემსახურება;
  • აღნიშნული სასამართლო გადაწყვეტილებები უპირატესობას ანიჭებენ ღიაობის ინტერესს, იმ შემთხვევებში როდესაც აშკარაა, რომ ინფორმაციის გასაჯაროება ხელს შეუწყობს საჯარო დებატების წარმართვას ამა თუ იმ საზოგადოებრივი მნიშვნელობის საკითხზე;
  • იმ შემთხვევაში, როდესაც სასამართლო პროცესი არის ღია ან/და სასამართლო გადაწყვეტილება ცხადდება საჯაროდ თითქმის შეუძლებელია გადაწყვეტილების გაცემაზე უარის თქმის დასაბუთება;
  • სასამართლო პროცესები იშვიათად ცხადდება დახურულად მხარეთა პირადი ცხოვრების ხელშეუხებლობის მოტივით (გამონაკლისია მცირეწლოვანთა ინტერესები);
  • დაუშვებელია მთლიანი გადაწყვეტილების საიდუმლოდ გამოცხადება - მხოლოდ შესაბამისი ნაწილების (მაგ., ბავშვების შემთხვევაში ინიციალების გამოყენება);
  • პირადი ცხოვრების ხელშეუხებლობის ინტერესი ვერ ექნებათ კომპანიებს (მათ ეხებათ სხვა, მაგალითად - კომერციული საიდუმლოების დაცვის ინტერესი);

IDFI პროექტს 2016 წლის ივლისიდან ახორციელებს აღმოსავლეთ-დასავლეთის მართვის ინსტიტუტის პროგრამის „კანონის უზენაესობის მხარდაჭერა საქართველოში“ (PROLoG) მხარდაჭერით. პროგრამა დაფინანსებულია შეერთებული შტატების საერთაშორისო განვითარების სააგენტოს (USAID) მიერ.