ოსკარის რიგით 89-ე დაჯილდოების ცერემონიალს, რომელსაც ჯიმი კიმელი წაიყვანს, ახალი პროდიუსერები მაიკლ დე ლუკა და ჯენიფერ ტოდი ეყოლება.

"მაიკლს და ჯენიფერს ერთად მუშაობის არაჩვეულებრივი გამოცდილება აქვთ, ასევე დიდ პატივს სცემენ კინოს და ჩვენ დარწმუნებულები ვართ ისინი არაჩვეულებრივად გაართმევენ თავს ამ მნიშვნელოვან და ამაღელვებელ საქმეს, რომელი დაუვიწყარი იქნება ყველა კინომანისთვის", - ამბობს შერილ ბუნ აიზეკსი, ამერიკის კინოაკადემიის დირექტორი.

ოსკარის წინა წლის პროდიუსერები რეჯინალდ ჰადლინი და დეივიდ ჰილი იყვნენ, თუმცა როგორც აღმოჩნდა შარშანდელმა შოუმ, რომელიც მედიაში პოლიტიკური ავანსცენის სახელით მოიხსენიებოდა შესაბამისი რეიტინგი ვერ დადო, მეტიც ბოლო შვიდი წლის განმავლობაში ყველაზე დაბალი რეიტინგი ჰქონდა. შოუს საერთო ჯამში 34 მილიონმა ადამიანმა უყურა, მაშინ როდესაც მის წინა წელს ოსკარის მაყურებელთა რიცხვი 37.260 მილიონი ადამიანი იყო.

აღსანიშნავია ისიც, რომ ცერემონიალის რეიტინგმა ბოლო ათწლეულის განმავლობაში საკმაოდ იკლო, მაგალითისთვის შეგვიძლია ვთქვათ, რომ 2001 წლის შემდეგ ყველაზე მაღალი რეიტინგი ოსკარს 2014 წელს ჰქონდა, როდესაც მას 43 მილიონზე მეტმა ადამიანმა უყურა.

რეიტინგის დაცემა გახდა იმის მიზეზიც, რომ წელს ოსკარს ჯიმი კიმელი წაიყვანს. არჩევანი კიმელზე ტელეარხ ABC-ის რეკომენდაციით შეჩერდა, რომელსაც დაჯილდოების ტრანსლირების უფლება 2028 წლამდე $75 მილიონად აქვს ნაყიდი. არხის წარმომადგენლები იმედოვნებენ, რომ სწორედ ჯიმი იქნება ის, ვინც შეძლებს მაყურებელს ოსკარისადმი ინტერესი დაუბრუნოს. სწორედ ამავე მიზეზით შეიცვალნენ პროდიუსერებიც, აკადემიის აზრით ჯენიფერი და მაიკლი შეძლებენ მაყურებელს შესთავაზონ შოუ, რომელიც მათ ეკრანთან მიაჯაჭვებს.

"ბედნიერები ვართ იმ ფაქტით რომ სწორედ ჩვენ ვიქნებით აკადემიის ჯილდოს პროდიუსერები. ორივე თაყვანს ვცემთ ოსკარს და შეიძლება ითქვას, რომ მისი ყურების დროს გავიზარდეთ. მაქსიმალურად ვეცდებით კარგი და საინტერესო შოუს შექმნას, სადაც აშკარა იქნება კინოს ზეიმი და ის, თუ რამხელა ძალა აქვთ იმ ადამიანებს, რომლებიც იქ შეიკრიბებიან", - ამბობენ დე ლუკა და ტოდი.

მაიკლ დე ლუკა სამჯერ იყო ნომინირებული ოსკარზე ფილმებისთვის - Captain Phillips, Moneyball და The Social Network. რაც შეეხება ჯენიფერ ტოდს, ის საპროდიუსერო კომპანია Pearl Street Films-ის დირექტორია, რომელიც მეთ დეიმონმა და ბენ აფლეკმა დააარსეს. ის ასევე იყო პროდიუსერი ფილმებისა - Austin Powers, Memento, Across the Universe, Alice in Wonderland და სხვა.

შეგახსენებთ, რომ ოსკარი 2017 26 თებერვალს გაიმართება, რომლის პირდაპირი ეთერსაც საქართველოში ტელეკომპანია GDS შემოგვთავაზებს.