ევროკავშირის ელჩი საქართველოში, კარლ ჰარცელის განცხადებით, ოპოზიციასა და სახელისუფლებო პარტიას შორის მიმდინარე მოლაპარაკებების მიზანი სრულად დაკომპლექტებული პარლამენტია. ჰარცელის თქმით, ეს ყველა მხრიდან პასუხისმგებლობის აღებას მოითხოვს. მან, ასევე, ოპოზიციონერ ლიდერებთან შეხვედრა ნაყოფიერად შეაფასა. ევროკავშირის ელჩი ყველა ოპოზიციონერ ლიდერს პარასკევს, 20 ნოემბერს შეხვდა.

"მე ყოველთვის ვხედავ გამოსავალს. ეს ძალისხმევა გაგრძელდება. ჩვენ ვნახავთ, როდის მივალთ იმ წერტილამდე, როდესაც ამ დისკუსიის განვითარება იქნება შესაძლებელი. მიზანი არის — სრულად დაკომპლექტებული პარლამენტი, რომელიც აიღებს პასუხისმგებლობას, რასაც საქართველოს ყველა მოქალაქე ელოდება. ეს კი ყველა მხრიდან პასუხისმგებლობის აღებას მოითხოვს", — განაცხადა კარლ ჰარცელმა. [რუსთავი 2-ის თარგმანი].

გუშინ, 21 ნოემბერს საპარლამენტო არჩევნების მეორე ტური ჩატარდა, სადაც არცერთი ოპოზიციური პარტია მონაწილეობდა. ისინი აცხადებენ, რომ არჩევნები გაყალბდა. თუმცა, კანონის თანახმად, ტექნიკურად მათი სახელები ბიულეტენებში მაინც იყო. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.