აშშ-ის სახელმწიფო მდივანი, მაიკ პომპეო საქართველოში ვიზიტის ბოლოს ადგილობრივ არასამთავრობო ორგანიზაციებს ესაუბრა. როგორც შეხვედრის შემდეგ NGO-ების წარმომადგენლებმა თქვეს, საუბარი, ძირითადად, სასამართლო სისტემას ეხებოდა და ნახევარსაათიანი შეხვედრის განმავლობაში ისინი შეეხნენ სისტემაში გავლენიანი ჯგუფების არსებობას. ამასთან, პომპეოსთან რამდენჯერმე გაჟღერდა ქართული ოცნების თავმჯდომარის, ბიძინა ივანიშვილის სახელიც.

საერთაშორისო გამჭვირვალობა — საქართველოს პროგრამების მენეჯერის, გია გვილავას თქმით, პომპეომ სასამართლოში არსებული გავლენიანი ჯგუფის, ე.წ. კლანის შესახებ იკითხა. მისივე შეფასებით, სახელმწიფო მდივანი ინფორმირებულია ე.წ. კლანთან დაკავშირებით და სჯერა მისი არსებობის.

"მტკიცებულებების წარდგენა მას არ მოუთხოვია. მან იკითხა, როგორი მეთოდებით მუშაობენ გავლენიანი ჯგუფები, კლანზეა საუბარი", — აღნიშნა შეხვედრის შემდეგ გვილავამ.

როგორც ის ამბობს, შეხვედრაზე სასამართლო სისტემაში არსებული პრობლემების გარდა, კონკრეტულ საქმეებზეც ისაუბრეს. კერძოდ, მათ ანაკლიის პორტის, ფილიპ მორისის და კარტოგრაფების საქმეები განიხილეს.

"ჩვენ ვართ ის ხალხი, რომელიც სასამართლოზე მუშაობს. ჩვენ რომ შეგვხვდა, ნიშნავს იმას, რომ ამ ხალხს ყველაზე მეტად ანაღვლებს სასამართლო", — თქვა გვილავამ.

ღია საზოგადოება საქართველოს კიდევ ერთი წარმომადგენლის, სოფო ასათიანის განცხადებით, მათ სთხოვეს ამერიკის საელჩოსა და ხელისუფლებას, რომ დააკვირდნენ მიმდინარე პროცესებს და აქტიური როლი ჰქონდეთ სასამართლო ხელისუფლების ცვლილებაში.

"ჩვენ, როგორც არასამთავრობო სექტორმა, რამდენიმე ვარიანტი შევთავაზეთ. პირველი, ეს იყო პოლიტიკური კონსენსუსი, რომლის გარეშეც პრინციპში ის ჩიხი, რომელშიც ვიმყოფებით, ვერ აღმოიფხვრება. შევთავაზეთ საელჩოს, რომ მას ჰქონდეს აქტიური ფასილიტატორის როლი, როგორც ეს ბევრჯერ გაუკეთებია, და მხოლოდ პოლიტიკურ კონსენსუსს ეყრდნობოდეს ნებისმიერი შემდგომი ქმედება სასამართლოსთან მიმართებით. ასევე, მეორე მეთოდი, რომლითაც ამერიკის ხელისუფლებას შეუძლია გავლენა ჰქონდეს დემოკრატიულ პროცესზე, არის დახმარება საქართველოს ინსტიტუციების მიმართ. ჩვენ საჭიროდ ვთვლით, რომ სასამართლოს რეფორმა იყოს აუცილებელი წინაპირობა ყველა ასეთი ხელშეკრულების", — აღნიშნა სოფო ასათიანმა.

გარდა ამისა, ასათიანმა თქვა, რომ როდესაც კლანის პრობლემებზე საუბრობდნენ, ორი გამოწვევა ახსენეს — გარე გამოწვევა, ხელისუფლების მიერ კლანთან დადებული შეთანხმებები და ხელისუფლების მხარდაჭერა და შიდა კონტროლის მექანიზმი, რომელსაც კლანი უკვე თავად ახორციელებს სასამართლოს შიგნით.

მისივე თქმით, კარგად და გასაგებად გადასცეს პომპეოს ის მესიჯი, რომ სასამართლო ხელისუფლების პრობლემა დამოკიდებულია პოლიტიკური ნების არარსებობასთან, რომ შეიქმნას დამოუკიდებელი და მიუკერძოებელი მართლმსაჯულება. ასათიანმა აღნიშნა ისიც, რომ შეხვედრისთვის განკუთვნილ 30 წუთში მოახერხეს ღრმად ჩასულიყვნენ ყველა იმ საკითხში, რაც სასამართლო ხელისუფლებას ეხება.

როგორც მან თქვა, მაიკ პომპეომ მოისმინა არასამთავრობოების კრიტიკა სასამართლოს მიმართ და გამოთქვა დიდი მხარდაჭერა არასამთავრობო სექტორის მიმართ.

საქართველოს დემოკრატიული ინიციატივის წარმომადგენლის, გვანცა წულუკიძის თქმით, მათ შეხვედრაზე ბიძინა ივანიშვილზე, როგორც არაფორმალურ მმართველზეც ისაუბრეს და აღნიშნული ფრაზაც არაერთხელ გაჟღერდა.

"ივანიშვილის სახელი გაჟღერდა რამდენჯერმე. გაჟღერდა, როგორც არაფორმალური მმართველის, რომელსაც ხელთ უპყრია ხელისუფლების სამივე შტო და ეს არის ადამიანი, რომელიც არაფორმალურად აკონტროლებს ხელისუფლებას", — განაცხადა წულუკიძემ.

რაც შეეხება არჩევნებს, წულუკიძის თქმით, ამ თემას ძალიან მცირედით შეეხნენ და იმ კუთხით, რომ სასამართლოში არის საარჩევნო დავები, რომელთა უმრავლესობა განუხილველია.

პომპეო თბილისში გუშინ, 17 ნოემბერს საღამოს ჩამოფრინდა და ოფიციალური შეხვედრები დღეს დაიწყო.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, ასევე, რასამთავრობო ორგანიზაციებს.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. როგორც ისინი აცხადებენ, ამ გზით სურთ პომპეოს გააგებინონ, რომ 31 ოქტომბრის არჩევნები გაყალბდა.

სახელმწიფო მდივნის გამგზავრების შემდეგ ცნობილი გახდა, რომ ის ტოვებს წარმომადგენელს, რომელიც ოპოზიციასა და არასამთავრობოებს შეხვდება.