ეკონომისტმა გიორგი პაპავამ ტელეკომპანია კავკასიას ეთერში მთავრობის მიერ ამოქმედებული საბანკო სესხების გალარების პროგრამა გააკრიტიკა და განაცხადა, რომ ეს ცვლილება ეკონომიკური ზრდისა და ლარის გამყარებისკენ არაა მიმართული:

"იმ სიტუაციაში, როდესაც ლარი მნიშვნელოვნად გაუფასურებულია და არ გვაქვს ეკონომიკური ზრდა, მთავრობამ და ეროვნულმა ბანკმა რაღაცები მოიგონეს, რომ შეაჩერონ ლარის გაუფასურება და წაახალისონ ეკონომიკური ზრდა, გადასახადებისა და სახელმწიფო ხარჯების ზრდით. კომიკურია, რომ ეს ცვლილებები საღდება, როგორც ეკონომიკური ზრდის განმაპირობებელი. ამას არაფერი საერთო არ აქვს ეკონომიკურ ზრდასთან.

ამ ცვლილებით [სესხების გალარებით] რასაც მიაღწევს, იქნება 27 ათასით ნაკლები მსესხებელი, ვისაც სავალუტო რისკი ექნება. ეს ფინანსურ სტაბილურობაზე მოკლევადიან პერიოდში დადებით გავლენას მოახდენს, უხეშად რომ ვთქვათ, ისინი აღარ ინერვიულებენ და უფრო ადვილად შეძლებენ სესხის დაფარვას და აღარ იქნებიან ფინანსური რისკის ქვეშ".

პაპავა აქცენტს აკეთებს იმ ადამიანების მდგომარეობაზეც, ვისაც მომავალში განსხვავებულ პირობებში მოუწევს სესხის აღება:

"თუმცა, ყველა ის ადამიანი, ვისაც აქამდე შეეძლო თეორიულად უკეთეს პირობებში სესხის აღება, ვიდრე ახლა შეძლებს, მათი მდგომარეობა იქნება ამ ცვლილებით გამოწვეული.

ვიღაცა სესხს რომ ვეღარ აიღებს, რადგან ლარში საპროცენტო განაკვეთი უფრო მაღალი ექნება და დოლარში სესხის აღებასთან წვდომა აღარ ექნება, ესაა ამ რეფორმის ფასი. მიკროსაფინანსო ორგანიზაცია რომ თანხებს ვეღარ მოიძიებს, რომ თავისი საქმიანობა გააგრძელოს, ესაა რეალური ფასი ამ ცვლილების".

მთავრობამ სესხების გალარების პროგრამა 17 იანვარს დაიწყო. კომერციული ბანკები გალარებულ სესხებს გასცემენ არსებული საბაზრო პროცენტით. რაც შეეხება კურსს, სესხების გალარება მოხდება გალარების დღეს არსებულ ოფიციალურ გაცვლით კურსს გამოკლებული 20 თეთრით. მაგალითად, თუ აშშ დოლარის მიმართ ოფიციალური გაცვლითი კურსი არის 2,7 ლარი, მაშინ სესხის გალარება მოხდება 2,5 კურსით. კურსთაშორის სხვაობა კი სახელმწიფო ბიუჯეტიდან დაფინანსდება.

აღნიშნულ სუბსიდიაზე საუბრისას, რომელიც 65 მილიონ ლარს შეადგენს, პაპავა დასძენს, რომ ამ ხარჯის გაცემა ქვეყნისთვის მასშტაბური სარგებლის მომტანი არ იქნება.

სესხების გალარება ნებაყოფლობითი და ერთჯერადი პროექტია, რომელსაც ერთობლივად ახორციელებენ საქართველოს მთავრობა და ეროვნული ბანკი.