მას შემდეგ, რაც საქართველოში არჩევნების გაყალბებასთან დაკავშირებით შფოთვა იზრდება, ამერიკის შეერთებული შტატების სახელმწიფო მდივანმა უნდა გამოიყენოს მომენტი და ოპოზიციის წარმომადგენლებს შეხვდეს — ამ სათაურით სტატიას Washington Examiner აქვეყნებს.

"ამჟამად საგანგაშოა 31 ოქტომბრის სადავო არჩევნები, რომელშიც მმართველმა პარტიამ, ქართულმა ოცნებამ, დიდი გამარჯვება მოიპოვა. მიუხედავად იმისა, რომ საზოგადოებრივი აზრის გამოკითხვების შედეგად არჩევნებამდე ქართული ოცნების სტაბილური ლიდერობა გამოიკვეთა, პარტიამ არჩევნების დღეს მოსალოდნელზე უკეთესი შედეგი აჩვენა. ოპოზიციურმა პარტიებმა უარყვეს შედეგები. ისინი ამტკიცებენ, რომ ე.წ. კარუსელის გამოყენება და ამომრჩევლის დაშინება სერიოზული პრობლემები იყო, რაც მოქმედ მთავრობას უსამართლო უპირატესობას ანიჭებს. საერთაშორისო რესპუბლიკური ინსტიტუტის მიერ ორშაბათს გამოქვეყნებული ანგარიში ამ მტკიცებებს სანდოობას ანიჭებს", — წერია სტატიაში.

სტატიაში ნახსენებია ისიც, რომ რამდენიმე საარჩევნო უბანზე იყო დისბალანსი და ბიულეტენთა რაოდენობა მისული ამომრჩევლის რაოდენობას აჭარბებდა.

"მოხსენებაში ნათქვამია, რომ არსებობდა სიტუაციები, როდესაც ბიულეტენებმა გადააჭარბა ამომრჩეველთა ხელმოწერების რაოდენობას. ასევე, აღნიშნულია, რომ სამი ძირითადი სადამკვირვებლო ორგანიზაციიდან, არც ერთს არ დაუკმაყოფილდა საჩივრების 17%-ზე მეტი", — წერს Washington Examiner.

სტატიაში გამოთქმულია მწუხარება იმის თაობაზე, რომ პომპეო ვიზიტის დროს ოპოზიციური პარტიის წარმომადგენლებს არ შეხვდება, მიუხედავად იმისა, რომ ამის საჭიროება არსებობს.

"სამწუხაროდ, მაშინ როდესაც სახელმწიფო დეპარტამენტი ამბობს, რომ პომპეო მისი ვიზიტის ფარგლებში სამოქალაქო საზოგადოების წარმომადგენლებს შეხვდება, ოპოზიციური პარტიები აცხადებენ, რომ მათ შეხვედრის შეთავაზება არ მიუღიათ. თუ აღნიშნული სიმართლეა, ეს იქნება თბილისში აშშ-ის მაღალი დონის წინა ვიზიტებისგან გადახვევა. ეს კი შემაშფოთებელია, რადგან ბოლო არჩევნების არეულობა, რაც ჩვენ ვიხილეთ, ცალკეულ პრობლემას არ წარმოადგენს და ის ასახავს დემოკრატიული ნორმებისგან პრემიერმინისტრ გახარიას ნელ, მაგრამ მზარდ და აშკარა გადახვევას", — ნათქვამია სტატიაში.

გამოცემა საუბრობს საქართველოს გეოპოლიტიკურ მდგომარეობაზეც. სტატიაში აღნიშნავენ, რომ საქართველო უფრო და უფრო ემსგავსება პოსტსაბჭოთა სახელმწიფოს, სადაც არაფერი კეთდება აუთვისებელი საინვესტიციო რესურსის განვითარებისთვის.

"საქართველოს მთავრობას აქვს ფორმალურად დაშოშმინების პოლიტიკის მიმართულება რუსეთთან. 2008 წლის ომში დაკარგული ტერიტორიების ფონზე, რუსეთი აგრძელებს საქართველოს დამოუკიდებლობლობისა და სოციალური სტაბილურობისთვის ძირის გამოთხრას. ამავდროულად, ვლადიმერ პუტინის ინტერესია, არ დაუშვას საქართველოს ეკონომიკური კავშირების გაძლიერება ევროპასთან, რაც შესრულდა პრემიერმინისტრ გახარიას მიერ. როგორც ჩანს, ქართული ოცნების მილიარდერი ოლიგარქი დამფუძნებლის, ბიძინა ივანიშვილის ბრძანებით, პორტისა და ოპტიკურ-ბოჭკოვანი საკაბელო პროექტები ჩაიშალა. ეს ორი ინფრასტრუქტურული ინტერესები საქართველოს მოსახლეობისთვის პოზიტიური იქნებოდა და ხელს შეუწყობდა აუთვისებელ საინვესტიციო რესურსის განვითარებას. ამის ნაცვლად, საქართველო სულ უფრო და უფრო ემსგავსება კიდევ ერთ პოსტსაბჭოთა სახელმწიფოს — ადგილს, სადაც ბიზნესი მოითხოვს ძალაუფლების მქონე პირთა კეთილდღეობას და ბიზნესის კეთებას მხოლოდ ხელისუფლების წარმომადგენლებთან", — ნათქვამია სტატიაში.

ამერიკის შეერთებული შტატების სახელმწიფო მდივანი, მაიკ პომპეო საქართველოს დღეს, 17 ნოემბერს ეწვევა და გამართავს შეხვედრებს ხელისუფლების წარმომადგენლებთან, სამოქალაქო სექტორის წარმომადგენლებთან და პატრიარქთან.

Washington Examiner არის ამერიკული კონსერვატიული ახალი ამბების სააგენტო და ყოველკვირეული ჟურნალი, რომელიც მდებარეობს ვაშინგტონში.