ამერიკის შეერთებულ შტატებში დონალდ ტრამპის მომხრეებმა აქცია გამართეს. ისინი ამბობენ, რომ საპრეზიდენტო არჩევნების შედეგები გაყალბდა და ტრამპს მხარდაჭერას უცხადებენ. ინფორმაციას ამის შესახებ BBC ავრცელებს.

მედიის ცნობით, პროტესტს ულტრამემარჯვენე ჯგუფებიც შეურთდნენ, მოგვიანებით კი მშვიდობიანი მსვლელობა დაპირისპირებაში გადაიზარდა, რადგან ტრამპის მომხრეებსა და მოწინააღმდეგეებს შორის შეტაკება მოხდა. გამოცემა ოფიციალურ პირებზე დაყრდნობით წერს, რომ აქციაზე 20-მდე პირი დააკავეს.

აღნიშნულს დონალდ ტრამპი ტვიტერზე გამოუხმაურა. მან პოლიციას მოუწოდა, რომ თავისი საქმე გააკეთოს და "უკან არ დაიხიოს".

ამერიკის საპრეზიდენტო არჩევნები 3 ნოემბერს გაიმართა და დონალდ ტრამპი, დემოკრატ ჯო ბაიდენთან დამარცხდა. რესპუბლიკელი დამარცხებას არ აღიარებს. ჯო ბაიდენმა კი, არჩეული პრეზიდენტის რანგში ერს უკვე მიმართა.