კოვიდინფიცირებული პრემიერის, გიორგი გახარიას განცხადებით, ის ყველა წესს იცავდა, თუმცა, როგორც ჩანს, კიდევ უფრო მეტი ყურადღება უნდა გამოეჩინა. როგორც მან იმედის ეთერში განაცხადა, ჯანმრთელობის მდგომარეობის კუთხით უკეთესადაა და სახლში მკურნალობს.

"რა თქმა უნდა, ვცდილობდი და ვიცავდი ყველა იმ წესს, რომელსაც ეპიდემიოლოგები გვირჩევდნენ, თუმცა როგორც ჩანს, კიდევ უფრო მეტი ყურადღება უნდა გამომეჩინა და ეს არის კიდევ ერთი მაგალითი ჩვენი თითოეული მოქალაქისთვის, რამდენად დიდი მნიშვნელობა აქვს, ზედმიწევნით დავიცვათ ყველა ის წესი, რომელსაც ეპიდემიოლოგები გვიდგენენ. ეს არის ვირუსის შეჩერების ერთადერთი ყველაზე სწორი გზა. მაგრამ იმ შემთხვევაში, თუ მაინც დავინფიცირდით, საგანგაშო აქაც არაფერია, წყნარად, მშვიდად უნდა მივყვეთ ისევ ექიმების რჩევას და ვიმკურნალოთ, როცა შესაძლებელია ბინაზე ან კოვიდ-სასტუმროში და მხოლოდ და მხოლოდ გართულებულ შემთხვევაში — ჰოსპიტალებში", — განაცხადა გიორგი გახარიამ.

გიორგი გახარიას კორონავირუსი 2 ნოემბერს დაუდასტურდა. ინფიცირებულია ასევე ეკონომიკის მინისტრი, ნათია თურნავა.