თეთრ სახლში მორიგი გამოსვლის დროს პრეზიდენტმა, დონალდ ტრამპმა კიდევ ერთხელ დემოკრატები მაქინაციაში დაადანაშაულა. თუმცა ამჯერადაც მტკიცებულებები არ წარუდგენია.

"თუ თქვენ დაითვლით ლეგალურ ხმებს, მე ვიგებ. თუ დათვლით არალეგალურ ხმებს, ისინი შეეცდებიან, არჩევნები მოგვპარონ", — განაცხადა დონალდ ტრამპმა.

დონალდ ტრამპმა კიდევ ერთხელ თქვა, რომ გადამწყვეტ შტატებში არჩევნებს იგებდა, თუმცა შემდეგ რიცხვებმა გაქრობა დაიწყეს.

თავის ამომრჩეველს მიმართა ჯო ბაიდენმაც. მან მოსახლეობას მოთმინებისკენ მოუწოდა.

"დემოკრატია ხანდახან უწესრიგოა და ხანდახან ეს უფრო მეტ დროსაც მოითხოვს", — განაცხადა ჯო ბაიდენმა.

პრეზიდენტ დონალდ ტრამპის გამოსვლამ დაიმსახურა კრიტიკა არა მხოლოდ დემოკრატებს, არამედ რესპუბლიკელებს შორისაც. ილინოისის შტატის კონგრესმენმა, ადამ კინზინგერმა, განაცხადა, რომ თუ ვინმე აქვს ეჭვები ფალსიფიკაციასთან დაკავშირებით, მტკიცებულებები სასამართლოში უნდა წარადგინოს.

"შეწყვიტეთ დეზინფორმაციის გავრცელება. ეს სიგიჟეა".

რესპუბლიკელმა კონგრესმენმა, ვილ ჰარდმა ტრამპის სიტყვებს საშიში და არასწორი უწოდა.

"დღეს საღამოს არ შეიძლება პრეზიდენტის სიტყვების დაცვა, რომელიც დემოკრატიას ძირს უთხრის".

ზოგიერთმა ტელევიზიამ — ABC CBS და MSNBC — ტრამპის გამოსვლის პირდაპირი ტრანსლაცია "ცრუ განცხადებების" გამო შეწყვიტა.

MSNBC-მ პრეზიდენტის გამოსვლა შეწყვიტა, როცა ამ უკანასკნელმა გამოაცხადა, რომ გაიმარჯვა.

"ჩვენ ისევ უჩვეულო მდგომარეობაში ვართ — არა მხოლოდ პრეზიდენტის გამოსვლის შეწყვეტით, არამედ მისი სიტყვების შესწორებითაც".

აშშ-ს საპრეზიდენტო არჩევნებზე ხმების დათვლა გრძელდება. ჯერჯერობით რთულია თქმა, ვინ გახდება პრეზიდენტი, რადგან ზოგიერთ შტატში ვითარება შეიძლება კარდინალურად შეიცვალოს.