CureVac-ის ექსპერიმენტული ვაქცინა ადამიანებში იმუნურ პასუხს აღძრავს. აღნიშნულის შესახებ ოფიციალური განცხადება გერმანულმა ბიო-ტექ ფირმამ ორშაბათს გააკეთა

"პირველი ეტაპის კვლევის შუალედური შედეგებით დაიმედებულნი ვართ", — განაცხადა კომპანიის უფროსმა აღმასრულებელმა ოფიცერმა, ფრანც-ვერნერ ჰაასმა.

ბიო-ტექ ფირმა თავისი ვაქცინისთვის სატრანსპორტო რნმ-ს (mRNA) იყენებს. მსგავსი მიდგომა ისეთ წამყვან ფარმაკოლოგიურ კომპანიებს აქვთ, როგორიცაა: Moderna, BioNTech და Pfizer. აღსანიშნავია, რომ ამ უკანასკნელებმა მასიური კლინიკური კვლევები ჯერ კიდევ ივლისის თვეში დაიწყეს.

CureVac-ის ექსპერიმენტულ ვაქცინას CVnCoV ჰქვია. კომპანიის განცხადებით, იგი კარგად ასატანი ვაქცინაა და ეს ფირმის გეგმებისთვის კარგის მანიშნებელია: მეცნიერებს წლის ბოლომდე კვლევის დასკვნითი ეტაპის დაწყება და 30 ათასი მოხალისის აცრა აქვთ გადაწყეტილი.

CureVac-ს ზურგს გერმანელი ბიო-ტექ ინვესტორი, დიტმარ ჰოპი, გეითსების ფონდი და ფარმაკოლოგიური კომპანია GlaxoSmithKline უმაგრებენ. კომპანიის განცხადებით, აცრამ მოხალისეებში ანტისხეულების გამანეიტალებელი რაოდენობა გააჩინა, რაც მათი შემდგომი დაცვის გარანტიაა.

პოტენციური ვაქცინის ერთ-ერთი პერსპექტიული კანდიდატი ოქსფორდის უნივერსიტეტის პროდუქტი გახლავთ, რომელსაც იგი კომპანია AstraZeneca-სთან ერთად იკვლევს. იმუნიზაციის ეფექტის მისაღწევად, ისინი სატრანსპორტო რნმ-ის ნაცვლად სხვა ვირუსს იყენებენ.

ინფექციურ სნეულებათა ამერიკელმა ექსპერტმა, ენტონი ფაუჩიმ განაცხადა, რომ კორონავირუსის უსაფრთხო და ეფექტიანი ვაქცინები რისკ-ჯგუფებში შემავალი ამერიკელებისთვის დეკემბრის ბოლოსთვის ან იანვრის დასაწყისისთვის იქნება ხელმისაწვდომი.

პარტნიორის ძიებაში

CureVac-ს სურდა, რომ საკუთარ ვაქცინაში კონკურენტებთან შედარებით სატრანსპორტო რნმ-ის უფრო მცირე რაოდენობა გამოეყენებინა. როგორც ჩანს, მათ იმედები გაუცრუვდათ, რადგანაც მესამე, დასკვნითი ეტაპის კვლევისთვის 5 სავარაუდო დოზიდან ყველაზე დიდი, 12 მიკროგრამი აირჩიეს.

შედარებისათვის: BioNTech და Pfizer თავიანთი დასკვნითი ეტაპის კვლევებისთვის ერთ აცრაში 30 მიკროგრამს იყენებენ. მათი განცხადებით, ამ დოზამ ადამიანებში უფრო მეტი ანტისხეულის გამომუშავება შეძლო, ვიდრე ეს დაავადების მოხდით არის შესაძლებელი.

ბიო-ტექ ფირმა Moderna მისი კონკურენტის, BioNTech-ის მსგავსად მასიური კვლევის ეფექტიანობის შესახებ მონაცემებს ამ თვეში დაამუშავებს. ისინი ვაქცინაში 100 მიკროგრამ სატრანსპორტო რნმ-ს იყენებენ და კვლევის საწყისი ეტაპების მონაცემებით, ჯეროვანი რაოდენობით ანტისხეულების გამომუშავება მათ ვაქცინასაც შეუძლია.

ამ ეტაპზე კომპანია პოტენციურ ფარმაკოლოგიურ პარტნიორს ეძებს. ეს უკანასკნელი მას ვაქცინის შექმნაში, წარმოებასა და დისტრიბუციაში მნიშვნელოვნად დაეხმარება. როგორც ოფიციალური წარმომადგენელი აცხადებს, ამჟამად ფირმა რამდენიმე ვარიანტს განიხილავს.

კომპანიას ბაზარზე არსებობის 20-წლიანი გამოცდილება აქვს. მათ პირველი ეტაპის კვლევაში ჯანმრთელი, 16-დან 60-წლამდე ასაკის 250 გერმანელი და ბელგიელი ჩართეს.

CureVac-მა ასევე განაცხადა, რომ მათი ვაქცინით აცრის შემდგომ კორონავირუსის წინააღმდეგ T-უჯრედების ჩამოყალიბებაც ხდება, რაც იმუნიტეტის ეფექტიანი არსენალის საკვანძო ინდიკატორი გახლავთ. ამ მიმართულებით მონაცემთა ანალიზი გრძელდება.

როგორც ირკვევა, გვერდითი ეფექტების უმეტესობა მეორე აცრის შემდგომ (იმუნიზაციის სრული პროცედურა ორჯერად აცრას გულისხმობს) ვითარდება და იგი სისუსტეს, თავისა თუ კუნთების ტკივილს და იშვიათად ცხელებას მოიაზრებს. ჩივილები "24-48 საათის განმავლობაში სწრაფადვე ალაგდება", ნათქვამია განცხადებაში.