პარტია ჩვენი საქართველო-სოლიდარობის ალიანსის გენერალურმა მდივანმა, მარიამ ჯაშმა განაცხადა, რომ არჩევნების ლეგიტიმაციასთან დაკავშირებით სხვა ოპოზიციურ პარტიებს ეთანხმება, მაგრამ რაც შეეხება აქციებს, მის პარტიას განსხვავებული პოზიცია აქვს. ამის შესახებ ჯაშმა TV პირველის ეთერში ისაუბრა.

"ისევე, როგორც ჩვენმა პარტიამ თავი შეიკავა გაერთიანებული ოპოზიციის მაგიდის გარშემო მუშაობაში, სწორედ, იგივე პოზიცია გვაქვს დღეს. ჩვენ საპარლამენტო ფრაქციის ფორმატში, პარლამენტში ვაპირებთ ელჩებთან და დიპლომატიურ კორპუსთან შეხვედრას", — განაცხადა მარიამ ჯაშმა.

მარიამ ჯაშის განცხადებით, ამ არჩევნების ლეგიტიმაციის აღიარება ნიშნავს, რომ "საქართველოს დავაკარგინებთ თავისუფლებისთვის ბრძოლის 30 წელს".

ჯაშის თქმით, სულ მცირე, სამჯერ მეტი ხმების მოლოდინი ჰქონდათ და რეალური შედეგიც იყო ბევრად უფრო მეტი, ვიდრე ეს ოფიციალურ ოქმებშია. მისივე ინფორმაციით, შემაჯამებელ ოქმებში 500-დან 2 500-მდე ხმების სხვაობაა.