პატრიოტთა ალიანსის ლიდერი, ირმა ინაშვილი არჩევნების შედეგებს არ აღიარებს. მისი თქმით, პარტიის პოლიტსაბჭო სამომავლო გეგმებზე მსჯელობს.

"აბსოლუტურად შეუძლებელია, რომ საქართველოს პატრიოტთა ალიანსს ამ არჩევნებში მიეღო 3%! შეუძლებელია, რომ პარტიის საპროტესტო აქციებში მონაწილეობდეს უფრო მეტი ადამიანი, ვიდრე არჩევნებში მოგვცა ხმა! [...] ჩვენ არ ვაპირებთ დათმობას! იქნება აქციებიც და იქნება მოწოდებებიც! ჩვენ ვემზადებით დიდი ბრძოლისთვის", — ამბობს ინაშვილი.

ცესკოს ამ ეტაპისთვის ხმების, 97,09 პროცენტი აქვს დათვლილი. წინასწარი მონაცემები ასეთია:

  • ქართული ოცნება — 48,05%;
  • ერთიანი ნაციონალური მოძრაობა — ძალა ერთობაშია — 27,07%;
  • ევროპული საქართველო — 3,79%;
  • პატრიოტთა ალიანსი — 3,18%;
  • ლელო — 3,17%;
  • სტრატეგია აღმაშენებელი — 3,15%;
  • გირჩი — 2,92%;
  • ალეკო ელისაშვილი - მოქალაქეები — 1,34%;
  • ლეიბორისტული პარტია — 1%.

დღეს, 16:00 საათზე ოპოზიცია აქციას მართავს. ასე ეხმაურებიან ისინი არჩევნების შედეგებს. ოპოზიცია შედეგებს არ აღიარებს. მათი ნაწილი კი მანდატებზე უარის თქმას გეგმავს.