Human Rights Watch 2016 წლის ანგარიშში სპეციალურ ქვეთავში ყურადღებას ამახვილებს საქართველოში ლგბტ პირთა უფლებრივ მდგომარეობაზე.

იგი ეხება საქართველოში მომხდარ ისეთ ფაქტებს, როგორიცაა, ერთნაირსქესიანთა ქორწინება და ზოგადად, ქორწინების დეფინიციის განსაზღვრის საკითხი კონსტიტუციაში. კერძოდ, ის საკითხი, როდესაც პრეზიდენტმა გიორგი მარგველაშვილმა დაბლოკა რეფერენდუმის წინადადება იმის შესახებ, რომ ქორწინება უნდა განისაზღვროს როგორც ქალისა და კაცის ერთობა. ამასთან, პრემიერმა კვირიკაშვილმა განაცხადა, რომ ოქტომბრის საპარლამენტო არჩევნების შემდეგ, კონსტიტუციაში ქორწინების განსაზღვრის საკითხი ისევ გადაიხედებოდა.

ანგარიში ეხება საქართველოში 17 მაისის აღნიშვნის თემასაც, როდესაც მთავრობამ ლგბტ აქტივისტების მოთხოვნას, აღენიშნათ ჰომოფობიისა და ტრანსფობიის წინააღმდეგ ბრძოლის საერთაშორისო დღე, უარით უპასუხა. მაშინ საქართველოს მართლმადიდებელმა ეკლესიამ ოჯახის სიწმინდის დღის აღსანიშნად თბილისის მთავარ გამზირი დაიკავა და მსვლელობა გამართა. აღნიშნული დღე ეკლესიამ 2014 წელს დააწესა. ლგბტ აქტივისტებს უარი უთხრეს სხვა საჯარო სივრცის დათმობაზეც.

Human Rights Watch-ის ანგარიშში საუბარია ასევე, ტრანსგენდერი ადამიანების მიმართ განხორციელებული თავდასხმებზე. ქალთა ინიციატივების მხარდამჭერი ჯგუფის მონაცემებით, 2016 წელს, ტრანსგენდერ ადამიანებზე თანდასხმის 20 შემთხვევა დაფიქსირდა.