ფონდი ღია საზოგადოების ოფისში გამართულ პრესკონფერენციაზე ლგბტ საქართველოს აღმასრულებელმა დირექტორმა ლევან ბერიანიძემ უშიშროების თანამშრომელი მათ აქტივისტზე ზეწოლასა და შანტაჟში დაადანაშაულა:

"ჩვენს ერთ თანამშრომელს დაუკავშირდა უშიშროების თანამშრომელი, წაიყვანა მანქანით რაღაც ადგილზე, აჩვენა ე.წ. ქსივა, რომ უშიშროების თანამშრომელი იყო და მოუყვა მისი ცხოვრების ინტიმური დეტალები, უთხრა მეუღლის, შვილების, ახლობლების სახელები, ვინ სად სწავლობდა, ვინ სად მუშაობდა, აჩვენა იარაღი და დაემუქრა, არ მინდა სადმე ბნელ ქუჩაში გადაგეყაროო".

ბერიანიძის თქმით, ინციდენტი დამოუკიდებელი აქტივისტების მხრიდან 17 მაისის ორგანიზებაზე საჯარო საუბარს მოჰყვა. ის ვარაუდობს, რომ შესაძლოა მათ სხვა თანამშრომლებსა და აქტივისტებსაც აშინებდეს უშიშროება, თუმცა მას ინფორმაცია მხოლოდ ამ ერთ შემთხვევაზე აქვს:

"სთავაზობდა ფულს იმისთვის, რომ მასთან ეთანამშრომლა და ინფორმაცია მიეწოდებინა, აიძულებდა რაღაც დოკუმენტაციაზე ხელის მოწერას, ჩვენი აქტივისტების შევხედრებიდან ეუბნებოდა საუბრის ისეთ დეტალებს, რომლებიც არ უნდა სცოდნოდა მესამე პირს.

დღეს მივიღეთ, რომ ეს აქტივისტები დაკავებულნი არიან. 17 მაისს, რომელიც არის ლგბტ პირების დაცვის დღე, დააკავეს ლგბტ უფლებადამცველები და აქტივისტები".

ბერიანიძე ვარაუდობს, რომ უშიშროებას მათ ოფისში კამერა აქვს დამონტაჟებული, ან მათი რომელიმე თანამშრომელი უკვე მოსყიდულია.

ჩვენი აქტივისტების დაკავება, რომლებიც კედლებზე წერდნენ "სიყვარული თანასწორია" და მსგავს ფრაზებს, არის შემაშფოთებელი, რადგან ეს ხდება იმ კონტექსტში, როცა სახელმწიფო უსუსურია გამოიძიოს სიძულვილით მოტივირებული დანაშაულები

ლევან ბერიანიძე

ლგბტ საქართველოს წარმომადგენელი მიიჩნევს, რომ სახელმწიფო არათანაბრად ეპყრობა აქტივისტებსა და ლგბტ პირებზე მოძალადეებს:

"ჩვენი აქტივისტების დაკავება, რომლებიც კედლებზე წერდნენ "სიყვარული თანასწორია" და მსგავს ფრაზებს, არის შემაშფოთებელი, რადგან ეს ხდება იმ კონტექსტში, როცა სახელმწიფო უსუსურია გამოიძიოს სიძულვილით მოტივირებული დანაშაულები. სახელმწიფო არ სჯის იმ ადამიანებს რომლებსაც დანაშაული მიუძღვით ლგბტ ადამიანების მიმართ და შემდეგ გვეუბნება, რომ სწორედ ასე, ლგბტ აქტივისტების ამგვარი ქმედების დასჯით უზრუნველყოფს კანონის უზენაესობას.

სახელმწიფომ კვლავ ვერ მისცა გარანტია ლგბტ აქტივისტებს რომ ისინი შეძლებდნენ უსაფრთხოდ შეკრებას და სახელმწიფომ ვერ დაიცვა მათი გამოხატვის თავისუფლება, ასევე არ დაუტოვა გამოხატვის საშუალება იმის გარდა, რომ აქტივისტებს ჩაეტარებინათ პარტიზანული აქტივობები".

ბერიანიძე სახელმწიფოს ადანაშაულებს ლბგტ პირებისა და აქტივისტების უფლებების დაუცველობაში და ამბობს, რომ ის პირიქით ტერორს ახორციელებს მათ მიმართ.

On.ge დაუკავშირდა სახელმწიფო უსაფრთხოების სამსახურს, სადაც განგვიცხადეს, რომ არ ადასტურებენ ლგბტ საქართველოს აღმასრულებელი დირექტორის მიერ გავრცელებულ ინფორმაციას მათი თანამშრომლის დაშანტაჟებასთან დაკავშირებით და უწყება გამორიცხავს რაიმე სახის ზეწოლას.