თბილისის სახელმწიფოს უნივერსიტეტის პროფესორმა, იაგო კაჭკაშივილმა უნივერსიტეტს, რექტორსა და ეთიკის კომისიის წევრებს სასამართლოში უჩივლა. როგორც კაჭკაჭიშვილი ფეისბუქზე წერს, სასამართლომ საქმე წარმოებაში უკვე მიიღო.

მიმდინარე წლის ივლისში იაგო კაჭკაჭიშვილმა განაცხადა, რომ მას შემდეგ, რაც თსუ-ს რექტორი, გიორგი შარვაშიძე პლაგიატში ამხილა, მასზე შურისძიების რამდენიმე სერია მოაწყვეს. მისი განმარტებით, უნივერსიტეტში შექმნილმა ეთიკის კომისიამ, თავისივე დისერტაციის გამო, მეცნიერულ არაკეთილსინდისიერებაში დაადანაშაულა.

როგორც კაჭკაჭიშვილის ინტერესების დამცველმა, საიას იურისტმა, დავით ლომთაძე განმარტა, დავის საგანია გავრცელებული ინფორმაციის უარყოფა, შევიწროების დადგენა და მორალური ზიანის ანაზღაურება ერთი ლარის ოდენობით.

ლომთაძე On.ge-სთან ამბობს, რომ ეთიკის კომისიამ უსაფუძვლოდ და არგუმენტაციის გარეშე დაასკვნა, რომ იაგო კაჭკაჭიშვილის ნაშრომში თვითპლაგიატისა და კომპილაციის ნიშნები შეინიშნებოდა.

"ეს დასკვნა შემდეგ გადაგზავნეს აკადემიურ საბჭოში, შესაბამისად გაავრცელეს მცდარი ინფორმაცია. ამის გარდა ეს თავად პროცესი, რაც ჩვენთვის სადაო, ეს ყველაფერი ემსახურებოდა რექტორის მხრიდან განხორციელებულ შევიწროებას, იგივე დისკრიმინაციას", — აღნიშნა ადვოკატმა.

თსუ-ს რექტორის, გიორგი შარვაშიძის სადისერტაციო ნაშრომში პლაგიატზე საგამოძიებო ფილმი თავისუფლების მონიტორმა მოამზადა. ჟურნალისტური გამოძიების მიხედვით, რექტორის დისერტაციაში უცვლელად გადატანილია 2002 წელს ღია საზოგადოების ფონის მხარდაჭერით მომზადებული დოკუმენტის ტექსტი. სტუდია მონიტორის გამოძიების მიხედვით, ტექსტს წყარო მითითებული არ აქვს.

გიორგი შარვაშიძე ამბობს, რომ მის ნაშრომში პლაგიატი არაა და გავრცელებული ინფორმაცია უნივერსიტეტის დისკრედიტაციის მცდელობაა.

ამის შემდეგ პროფესორმა იაგო კაჭკაჭიშვილმა გაასაჯაროვა ილიას სახელმწიფო უნივერსიტეტის წერილი, სადაც ნათქვამია, რომ გიორგი შარვაშიძის სადისერტაციო ნაშრომში სრულად მეორდება ბროშურის ("სტრუქტურული რეფორმები უმაღლეს განათლებაში და საქართველოს კერძო უმაღლესი სასწავლებლების განვითარების ტენდენციები", ი.კ) ძირითადი ტექსტი. წერილის მიხედვით ეს ტექსტი ნაშრომის 34%-ს შეადგენს.

თსუ-ში აცხადებენ, რომ მაშინ, როცა რექტორმა სადისერტაციო ნაშრომი დაიცვა წყაროების მითითების სხვა სტანდარტი არსებობდა და არ აპირებენ ამ საკითხით ხელახლა დაინტერესდნენ. ამას გარდა, უნივერსიტეტში აცხადებენ, დისერტაციის ავტორი ტექსტში მადლობას უხდის იმ ჯგუფს, ვინც ტექსტის სადავო ნაწილზე იმუშავა.