თბილისის საქალაქო სასამართლომ ნიკა გვარამიას მიმართ განხორციელებული ძალადობისთვის რატი გაჩეჩილაძე 5 ათასლარიანი გირაო შეუფარდა და დარბაზიდან გათავისუფლდა. ამის შესახებ ინფორმაციას საზოგადოებრივი მაუწყებელი აქვეყნებს.

5 ათასლარიანი გირაოს შეფარდება გაჩეჩილაძის მიმართ პროკურატურა ითხოვდა, რაც მოსამართლემ დააკმაყოფილა. დაცვის მხარის მოთხოვნა ათასი ლარის შეფარდების შესახებ არ დაკმაყოფილდა. სასამართლომ ამ საკითხზე მსჯელობა რამდენიმე წუთის წინ დაასრულა.

8 იანვარს საქართველოს შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს თანამშრომლებმა რატი გაჩეჩილაძე დააკავეს. გამოძიება მას 7 იანვარს თბილისში, რესტორან დაინინგ რუმში ტელეკომპანია რუსთავის 2-ის გენერალური დირექტორის მიმართ ფიზიკურ და სიტყვიერი შეურაცხყოფას ედავებოდა. გაჩეჩილაძეს ბრალი დღეს წაუყენეს.

აღნიშნულ ფაქტთან დაკავშირებით, შსს-მ გამოძიება საქართველოს სისხლის სამართლის კოდექსის 126-ე მუხლით დაიწყო, რაც "ძალადობას" გულისხმობს. ამ მუხლის მიხედვით, ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია ჯანმრთელობის განზრახ მსუბუქი დაზიანება ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ანდა თავისუფლების აღკვეთით ვადით ერთ წლამდე.