მთავრობის ადმინისტრაციის ხელმძღვანელის, ნათია მეზვრიშვილის განცხადებით, თუ აპოკალიფსი იქნება, საბჭოს წევრები გამოვლენ და ტრიბუნიდან იტყვიან.

"როგორც მოგეხსენებათ, პირველივე დღიდან მთავრობა იყო უპრეცედენტოდ გამჭვირვალე. დამერწმუნეთ, არ მინდა ეს სიტყვა ვიხმარო, მაგრამ სხვა გზა არ არის, თუ აპოკალიფსი იქნება გამოვალთ და ამის შესახებ ამ ტრიბუნიდან ვიტყვით. ამის არანაირი პრობლემა საბჭოს არცერთ წევრს არასოდეს ჰქონია", — განაცხადა ნათია მეზვრიშვილმა.

მეზვრიშვილის თქმით, ინფორმაცია იმის შესახებ, რომ საწოლების საკმარისი რაოდენობა არ არის სიმართლეს არ შეესაბამება.

"ბოლო პერიოდის განმავლობაში ვრცელდება გარკვეული ცრუინფორმაციები სხვადასხვა საკითხებთან დაკავშირებით, რომ თითქოს არ არის საწოლების საკმრისი რაოდენობა, რომ თითქოს ადამიანები მიყრილები არიან სახლებში კოვიდსასტუმროებში და მათ არავინ მკურნალობს, რომ თითქოს ზარებზე პასუხი არ ხდება მასიურად და ეს ადამიანები კონსულტაციას ვერ გადიან. მე მინდა დავამშვიდო საზოგადოება, შფოთვის საფუძველი ნამდვილად არ არის ამ ნაწილში განსაკუთრებით. ეს ყველაფერი რეალობას არ შეესაბამება. მარტივად რომ ვთქვათ, არის ტყუილი და ემსახურება პანიკის დათესვის მიზანს იმ ადამიანების მხრიდან, ვინც ამ ინფორმაციას ავრცელებენ", — განაცხადა მთავრობის ადმინისტრაციის ხელმძღვანელმა.

მისივე თქმით, შეიძლება ერთეული შემთხვევები ფიქსირდება, სადაც დარღვევებს აქვს ადგილი, თუმცა ამას სისტემური ხასიათი არ აქვს.