რატი გაჩეჩილაძე ამბობს, რომ ნიკა გვარამიას ფიზიკური შეურაცხყოფა მან მიაყენა. ამის შესახებ გაჩეჩილაძემ ფეისბუკში დაწერა. ტელეკომპანია რუსთავი 2-ის ინფორმაციით, ის ტელეკომპანია მაესტროს ყოფილი დირექტორისა და საქართველოს პრეზიდენტობის ყოფილი კანდიდატის ლევან გაჩეჩილაძის შვილია.

რატი გაჩეჩილაძე სოციალურ ქსელში წერს, რომ ის თავად გამოცხადდება საგამოძიებო უწყებაში ადვოკატთან ერთად.

"ღიად ვაცხადებ: ეს შემთხვევა, რომელიც რესტორან Dinning room- ში მოხდა იყო ჩემი რეაქცია იმ ფიზიკურ და მორალურ შეურაცხყოფაზე, რომელიც მე და ჩემმა ოჯახმა განვიცადეთ განვლილი წლების განმავლობაში გვარამიას და არა მხოლოდ მისგან. ჩემს გარდა იმ ინციდენტში არ მონაწილეობდა არავინ!" - წერს გაჩეჩილაძე.

კითხვაზე გამოცხადდა თუ არა რატი გაჩეჩილაძე საგამოძიებო უწყებაში შინაგან საქმეთა სამინისტროში არ პასუხობენ. მათი თქმით, "მიმდინარეობს საგამოძიებო მოქმედებები".

ტელეკომპანია რუსთავი 2-ის გენერალურმა დირექტორმა, ნიკა გვარამიამ დღეს გაავრცელა ფეისბუკში განცხადება, რომ მას ფიზიკური შეურაცხყოფა მიაყენეს. აღნიშნულ ფაქტთან დაკავშირებით, შსს-მ გამოძიება საქართველოს სისხლის სამართლის კოდექსის 126-ე მუხლით დაიწყო, რაც "ძალადობას" გულისხმობს.

გთავაზობთ რატი გაჩეჩილაძის მიერ გამოქვეყნებულ განცხადებას:

რატი გაჩეჩილაძე

ფოტო: რატი გაჩეჩილაძე/Facebook.com