სახალხო დამცველი, ნინო ლომჯარია მთავრობას მოუწოდებს მოსახლეობას კოვიდინფიცირების დროს ბინაზე მკურნალობის პროტოკოლი განუმარტონ.

"მოსახლეობას განუმარტონ კოვიდით დაინფიცირების დროს როგორ ხდება ბინაზე მკურნალობა. უფრო ზუსტად, ვის და რა ვადაში ევალება დაუკავშირდეს პაციენტს; როგორი ფორმით და სიხშირით განხორციელდება პაციენტებზე ზედამხედველობა შესაბამისი სამედიცინო პერსონალის მიერ; რომელი კონკრეტული უწყებაა ამ პროცესზე ზედამხედველი, რათა პაციენტებმა შეძლონ არსებულ პრობლემებზე მისთვის ინფორმაციის მიწოდება და დროული დახმარების მიღება", — წერს ლომჯარია ფეისბუქგვერდზე.

მისივე თქმით, მთავრობამ, ასევე, უნდა გასცეს პირველადი სამედიცინო რჩევები, რითიც ინფიცირებული თვითმკურნალობის დროს ექიმთან დაკავშირებამდე იხელმძღვალებს.

აღნიშნულზე, ჯანდაცვის მინისტრმა, ეკატერინე ტიკარაძემ დღეს საკოორდინაციო საბჭოს სხდომის შემდეგ გამართულ ბრიფინგზე განაცხადა, რომ ბინაზე მკურნალობის პროტოკოლი ახლდება და ის ოთხშაბათს გახდება ცნობილი. გარდა ამისა, იგი აღნიშნავს, რომ პროტოკოლი მოქალაქეებისთვის ხელმისაწვდომი ვერ იქნება, რადგან ასეთ დროს ისინი თვითმკურნალობას მისდევენ.