საარჩევნო ადმინისტრაცია სტაციონარულ სამკურნალო დაწესებულებებსა და იზოლაციაში მყოფი ამომრჩევლების ყველა ჯგუფს შესაბამის მომსახურებას სთავაზობს. ცესკოში აცხადებენ, რომ კორონავირუსით ინფიცირებულებსა და იზოლაციაში მყოფებს, სანიტარულ-ჰოგიენური წესების მაქსიმალური დაცვით, არჩევნებში მონაწილეობის შესაძლებლობა ექნებათ.

ცესკოს პრესსპიკერის, ანა მიქელაძის განმარტებით, სპეციალური ჯგუფები მათ მობილური ყუთებით მოემსახურებიან. მისივე თქმით, ჯგუფის მხრიდან ეპიდემიოლოგების რეკომენდაციები სრულად იქნება დაცული. სპეციალურ ჯგუფებში შემავალ ადამიანებს კი, ჩვეულებრივ საარჩევნო უბნებთან შეხება არ ექნებათ.

"მუნიციპალიტეტებში საოლქო-საარჩევნო კომისიების მოქმედების საზღვრებში ცესკო არანაკლებ ერთ საარჩევნო უბანს შექმნის და სპეციალურ ჯგუფებს დააკომპლექტებს, რომლებიც საარჩევნო ყუთის მიტანას უზრუნველყოფენ. ამასთან, თვითიზოლაციაში მყოფ ამომრჩევლებს, ექნებათ საშუალება საარჩევნო ადმინისტრაციას მიმართონ ცესკოს საარჩევნო ყუთის მომსახურების მოთხოვნით", — აცხადებს ანა მიქელაძე.

ცესკოს ცნობით, ხმების დათვლა ცალკე, სპეციალურად შექმნილ საარჩევნო უბნებში მოხდება. დამკვირვებლებსა და მედიის წარმომადგენლებს საშუალება ექნებათ გადასატან ყუთებს გაყვნენ.

საპარლამენტო არჩევნები საქართველოში 31 ოქტომბერს გაიმართება.