მარგვეთისა და უბისის ეპისკოპოსი მელქისედეკი ამბობს, რომ ვერ შეაფასებს, რატომ დაუთმეს ბაგრატის ტაძრის ეზო პატრიოტთა ალიანსს პრეზენტაციისთვის, რადგან ეს მისი ეპარქია არაა. ამავე დროს იგი ამბობს, რომ ამას თავის ეპარქიაში "არავითარ შემთხვევაში" არ დაუშვებდა.

"იმიტომ, რომ, მაგალითად, ბაგრატის ტაძარი არის ერთიანი საქართველოს სიმბოლო. ის პარტია, რომელიც ფინანსდება რუსეთიდან, რომელიც არის ნამდვილად ოკუპანტი როგორც ჩვენი ტერიტორიებისა, ისე ეპარქიებისა, იქ უკანონოდ აგზავნის სასულიერო პირებს, ეკლესია უკანონოდ მოქმედებს, ეს ჩემთვის მიუღებელია", — განაცხადა მთავარი არხის ეთერში ეპისკოპოსი მელქისედეკი.

პირველ სექტემბერს ბაგრატის ტაძრის ეზოში პატრიოტთა ალიანსმა პარტიული შეკრება გამართა, რასაც კრიტიკა მოჰყვა. მაშინ საპატრიარქო და ქუთაისის მერიაც ამტკიცებდა, რომ ადგილი, სადაც პატრიოტთა ალიანსმა ყრილობა ჩაატარა, მათ საკუთრებაში არაა.

მაშინ პარტიაში On.ge-ს უთხრეს, რომ რომ მიტროპოლიტი საქმის კურსში იყო და გააფრთხილეს შეხვედრის თაობაზე.