ქუთაისის მუნიციპალიტეტის მერიაც და საქართველოს საპატრიარქოც აცხადებენ, რომ ბაგრატის ტაძრის მიმდებარე ტერიტორია, სადაც პატრიოტთა ალიანსის შეხვედრა გაიმართა, მათ საკუთრებაში არაა.

მას შემდეგ, რაც ბაგრატის ტაძრის ეზოში ირმა ინაშვილის მიერ გამართულ შეხვედრას სოციალურ ქსელში კრიტიკა მოჰყვა, საპატრიარქოს პრესსამსახურის ხელმძღვანელმა, ანდრია ჯაღმაიძემ განცხადება გამოაქვეყნა და აღნიშნა რომ ეს ტერიტორია სახელმწიფო საკუთრებაშია. ჯაღმაიძე ამბობს იმასაც, რომ იქ სხვადასხვა დროს სხვადასხვა ღონისძიება იმართება, რომელსაც არ უთანხმებენ ეპარქიას.

"ცნობისათვის, ისტორიულად ეს მიწა ეკუთვნოდა ბაგრატის ტაძარს, თუმცა შემდგომში ტაძარს გადაეცა მხოლოდ ნაწილი ისტორიულად კუთვნილი ტერიტორიისა, ხოლო ეს ადგილი სახელმწიფოს საკუთრებაში რჩება", — აცხადებს ჯაღმაიძე.

თუმცა, On.ge-ს ქუთაისის მერიის პრესსამსახურში განუცხადეს, რომ ტერიტორია მათ არ ეკუთვნით და სავარაუდოდ, საპატრიარქოს საკუთრებაშია.

"არის ადგილები, რომელიც არის კერძო, არის თვითმმართველობის ადგილები, ზოგი საპატრიარქოსია. ის ტერიტორია არ არის ადგილობრივი თვითმმართველობის, არანაირად. სავარაუდოდ, არის საპატრიარქოსი", — აცხადებენ მერიაში.

ფოტო: ირმა ინაშვილი/facebook

On.ge პატრიოტთა ალიანსსაც დაუკავშირდა. პარტიის წარმომადგენელმა, ირაკლი ჩიხლაძემ თქვა, რომ მიტროპოლიტი საქმის კურსში იყო და გააფრთხილეს შეხვედრის თაობაზე. მან სიტუაციის უკეთ გასარკვევად პარტიის გენერალურ მდივანთან, გოჩა თევდორაძესთან გადაგვამისამართა, რომელმაც განაცხადა, რომ ნებართვა ჰქონდათ, თუმცა თავად არ იცის, ვისგან. მისივე თქმით, თანხმობა რომ არ ჰქონოდათ, შეხვედრაც არ ჩატარდებოდა.

ირმა ინაშვილსა და ახალგაზრდების შეხვედრა 2020 წლის 1 სექტემბერს ქუთაისში, ბაგრატის ტაძრის ეზოში გაიმართა.