ოკუპირებული აფხაზეთი რუსეთს 500-საწოლიანი საველე ჰოსპიტალის მოწყობას სთხოვს. როგორც გამოცემა აფსნიპრესი წერს, მიმართვის წერილი აფხაზეთის დე ფაქტო თავდაცვის მინისტრმა, ვლადიმირ ანუამ რუსეთის თავდაცვის მინისტრ სერგეი შოიგუს 12 ოქტომბერს გაუგზავნა.

გარდა ჰოსპიტალის მოწყობისა ოკუპირებული აფხაზეთი მედიკოსების, სპეციალური აღჭურვილობისა და აუცილებელი მედიკამენტების გაგზავნას ითხოვს. როგორც აფხაზეთში განმარტავენ, აღნიშნული დახმარების თხოვნა რეგიონში ეპიდსიტუაციის მკვეთრ გაუარესებას უკავშირდება.

რუსეთის მიერ ოკუპირებული ტერიტორიების ე.წ. უწყებები ყოველდღიურად კორონავირუსის ათეულობით ახალ შემთხვევაზე საუბრობენ. თუმცა საქართველოს ჯანდაცვის სამინისტროში აცხადებენ, რომ ზუსტი რიცხვის დადგენა, ფაქტობრივად, შეუძლებელია.

ამასთან, ცნობილია, რომ აფხაზეთიდან კოვიდპაციენტები ცენტრალური ხელისუფლების მიერ კონტროლირებად ტერიტორიაზე გადმოჰყავთ.