რუსეთის საგარეო საქმეთა მინისტრმა, სერეგი ლავროვმა განაცხადა, რომ ყარაბაღში ცეცხლის შეწყვეტის კონტროლის მექანიზმში, შესაძლოა, რუსი სამხედრო დამკვირვებლები ჩაერთონ. ამის შესახებ ინფორმაცია გამოცემა TASS-მა გაავრცელა.

"მიგვაჩნია, რომ სწორი იქნებოდა, თუკი ჩვენი სამხედრო დამკვირვებლების ცეცხლის შეწყვეტის კონტროლის მექანიზმში ჩაერთვებოდნენ. რა თქმა უნდა, საბოლოო სიტყვა მონაწილე მხარეებზეა. ცხადია, ვფიქრობთ, რომ ერევანშიც და ბაქოშიც გაითვალისწინებენ მოკავშირეობრივ ურთიერთობას, ურთიერთობას სტრატეგიულ პარტნიორებს შორის", — განაცხადა სერეგი ლავროვმა.

ამასთან, ლავროვმა აღნიშნა, რომ რუსეთი არ იზიარებს თურქეთის მოსაზრებას მთიან ყარაბაღში კონფლიქტის სამხედრო გზით გადაწყვეტის შესახებ.

ასევე, სერგეი ლავროვმა განაცხადა, რუსეთის მთავარი გზავნილია, რომ მხარეები დაუყოვნებლივ შეხვდნენ და შეთანხმდნენ ცეცხლის შეწყვეტის კონტროლის იმ მექანიზმზე, რომელიც მათ დოკუმენტში აღნიშნული იყო და რომლის განხილვაც კი ამ დრომდე არავის დაუწყია.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე არიან შეთანხმებული. შეთანხმება ძალაში 10 ოქტომბრის, 12:00 საათიდან უნდა შესულიყო.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.