სომხეთი და აზერბაიჯანი 11 საათიანი მოლაპარაკებების შემდეგ ჰუმანიტარული მიზნით ცეცხლის შეწყვეტაზე შეთანხმდნენ. ამის შესახებ ინფორმაცია რუსეთის საგარეო მინისტრის სპიკერმა, მარია ზახაროვამ საკუთარ ფეისბუქგვერდზე გაავრცელა.

ზახაროვას მიერ გავრცელებულ შეთანხმების ფურცელი ოთხპუნქტიანია და ვკითხულობთ:

1. ჰუმანიტარული მიზნების გამო 2020 წლის 10 ოქტომბრის 12:00 საათიდან ცხადდება ცეცხლის შეწყვეტა სამხედრო ტყვეთა, სხვა დაკავებულთა და გარდაცვლილთა სხეულების გაცვლის გამო. აღნიშნული განხორციელდება წითელი ჯვრის საერთაშორისო კომიტეტის კრიტერიუმების შესაბამისად და მათი შუამავლობით.
2. ცეცხლის შეწყვეტის რეჟიმის კონკრეტული პარამეტრები დამატებით შეთანხმდება.
3. აზერბაიჯანისა და სომხეთის რესპუბლიკები ეუთოს მინსკის ჯგუფის შუამავლობით, ძირითადი პრინციპებიდან გამომდინარე, ცეცხლის შეწყვეტისა და ადრეული სამშვიდობო შეთანხმების მიღწევის მიზნით, მოლაპარაკებებს იწყებენ.
4. მხარეები ადასტურებენ მოლაპარაკების პროცესის ფორმატის უცვლელობას.

სომხეთი და აზერბაიჯანი მთიან ყარაბაღში ცეცხლის შეწყვეტასთან დაკავშირებით კონსულტაციებისთვის მოსკოვში პრეზიდენტმა ვლადიმერ პუტინმა 9 ოქტომბერს მიიწვია. მხარეები შეხვედრას დათანხმდნენ. ინფორმაცია ამის შესახებ გამოცემა FRANCE24-ზე გავრცელდა.

"ბაქომ და ერევანმა დაგვიდასტურა თავიანთი მონაწილეობა იმ კონსულტაციებში, რომელიც მოსკოვში გაიმართება", — განაცხადა რუსეთის საგარეო საქმეთა მინისტრის სპიკერმა, მარია ზახაროვამ.

აღსანიშნავია, რომ მანამდე საქართველოს პრემიერმინისტრმა, გიორგი გახარიამ დაპირისპირებული მხარეები მოლაპარაკებებისთვის საქართველოში მოიწვია. პრემიერმა განაცხადა, რომ მთიან ყარაბაღში ვითარების შემდგომი ესკალაცია ნეგატიურ გავლენას იქონიებს მთელი რეგიონის უსაფრთხოებაზე.

"ჩვენი საერთო ინტერესია, რაც შეიძლება სწრაფად დამყარდეს მშვიდობა რეგიონში. საქართველო მზად არის, ნებისმიერი ფორმით შეუწყოს ხელი ამ პროცესს, მათ შორის, დიალოგის გამართვის მიზნით, უმასპინძლოს კონფლიქტის მხარეების წარმომადგენელთა შეხვედრას თბილისში", — განაცხადა გახარიამ.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. აღსანიშნია, რომ აზერბაიჯანი გარდაცვლილ სამხედროებზე ინფორმაციას არ ავრცელებს, მაშინ, როცა სომხური მხარე აცხადებს, რომ მოწინააღმდეგეს ასეულობით ჯარისკაცი მოუკლა. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.