საიას 2020 წლის საპარლამენტო არჩევნების მეორე შუალედური ანგარიშის თანახმად, სახელმწიფოსა და პარტიის გამიჯვნის მოთხოვნის უგულებელყოფის 1 შემთხვევა დაფიქსირდა, ამომრჩევლის მოსყიდვის —1, მუქარისა და ძალადობრივი ქმედებების — 11, ხოლო პარტიის წინასაარჩევნო კამპანიისთვის დაბრკოლებების შექმნის — 3.

ორგანიზაციაში აღნიშნავენ, რომ სამთავრობო პროექტების პერსონიფიცირება და კონკრეტულ პარტიასთან აფილირება კვლავ გამოწვევად რჩება, რაც მმართველი პარტიის კამპანიის ნაწილად, ისევე როგორც, ამომრჩევლის ნებაზე მანიპულაციად აღიქმება.

"სექტემბერი გამოირჩეოდა ძალადობრივი ქმედებებით, რამაც საგანგაშო ხასიათი მიიღო ბოლნისსა და მარნეულში მომხდარი ძალადობრივი დაპირისპირების დროს. ამ მოვლენებს მიღმა, საიასთვის ცნობილი გახდა ოპოზიციური პარტიების [ნაციონალური მოძრაობა, ლელო, სტრატეგია აღმაშენებელი, ლეიბორისტები] აქტივისტებზე მუქარისა და თავდასხმის შემთხვევებიც. ყველა მათგანი სისხლის სამართლის დანაშაულის ნიშნებს შეიცავს", — აცხადებენ საიაში.

მათივე თქმით, წინა საანგარიშო პერიოდის მსგავსად, ხელისუფლების მხრიდან წინასაარჩევნო კამპანიის წარმოების ხელისშეშლის შემთხვევები [ლელო და ერთიანი საქართველოს დემოკრატიული მოძრაობა] ამჯერადაც გამოვლინდა, რაც თანასწორი საარჩევნო გარემოსთვის დამაზიანებელია.

ანგარიშში, ასევე, მოცემულია ინფორმაცია რამდენიმე მუნიციპალიტეტების მხრიდან საარჩევნო კანონმდებლობის მოთხოვნების დარღვევაზე.

საიას დამკვირვებლებმა აღნიშნული დარღვევები სექტებრის თვეში გამოავლინეს. წინასაარჩევნო პროცესებს საია, გრძელვადიანი სადამკვირვებლო მისიის ფარგლებში, 9 რეგიონული მონიტორის მეშვეობით თბილისში, აჭარაში, გურიაში, სამეგრელო-ზემო სვანეთში, იმერეთში, შიდა და ქვემო ქართლში, მცხეთა-მთიანეთსა და კახეთში აკვირდება.

დაახლოებით, იგივე დარღვევები გამოავლინა სამართლიანმა არჩევნებმა (ISFED). ამომრჩევლის სავარაუდო მოსყიდვა, ამომრჩევლის გულის მოგებისთვის დაანონსებული პროექტები, სავარაუდო ზეწოლა და ძალადობა, კამპანიაში ეკლესიის ჩარევა და ა.შ. — ეს ის საკითხებია, რომელიც ISFED-ის წინასაარჩევნო მონიტორინგის მესამე შუალედურ ანგარიშში აისახა. ანგარიშში, ძირითადად, 2020 წლის 4 აგვისტოდან 5 სექტემბრის ჩათვლით პერიოდია განხილული, აგრეთვე მოვლენები, რომელთა განვითარება 4 აგვისტომდე დაიწყო.