პროკურორის, ამირან გულუაშვილის განცხადებით, შესაძლოა, რომ საქმეზე დაკავებული პირები, მოქმედებდნენ დავალებების მიხედვით და დანაშაულებრივ ქმედებებში მონაწილეობდნენ ასევე სხვა პირები. ამის შესახებ მან TV იმედთან, გადაცემა ქრონიკაში ისაუბრა.

"უშუალოდ მოტივთან დაკავშირებით და საქმეში არსებული მტკიცებულებითი ხასიათის მინიშნებების გათვალისწინებით, საუბარია, რომ მოცემულ შემთხვევებში ბრალდებულები, შესაძლოა, მოქმედებდნენ სხვადასხვა, ასე ვთქვათ, დავალების შესაბამისად და, შესაძლებელია, დანაშაულებრივ ქმედებებში მონაწილეობდა ასევე სხვა პირები. რაც შეეხება მეტ დეტალიზაციას მოცემულ საკითხთან დაკავშირებით, აქ არ არის საუბარი იმაზე, რომ გამოძიება მალავს გარკვეულ ინფორმაციას საზოგადოებისაგან. ჩვენ ცალსახად უნდა განვსაზღვროთ, რომ არსებობს გარკვეულ შემთხვევებში ინტერესი, მათ შორის, საქმის ფიგურანტი პირებისთვის არ გახდეს გარკვეული მონაცემები ცნობილი და მას შემდეგ, რაც შესაბამისი მტკიცებულებითი სტანდარტი იარსებებს და გარკვეული შემაჯამებელი გადაწყვეტილების მიღების შესაძლებლობა იქნება, ბუნებრივია, საზოგადოება იქნება ინფორმირებული", — განაცხადა პროკურორმა.

მისივე თქმით, მიუხედავად იმისა, რომ კონკრეტული პირების მიმართ სისხლის სამართლებრივი დევნა უკვე დაიწყო, საქმეზე გამოძიება გრძელდება.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისის წევრები დააკავეს. 9 ოქტომბერს კი ილიჩვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასათავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: