საგადასახადო შეღავათით ისარგებლებს ორი დარგის, აიტი და საზღვაო კომპანიები. ამის შესახებ მთავრობის ბრიფინგზე ფინანსთა მინისტრმა, ივანე მაჭავარიანმა ისაუბრა.

მინისტრის განცხადებით, ეს არის საქმიანობები, რომელსაც დაბეგვრის ამ რეჟიმისთის საქართველოს მთავრობა დასაშვებად სცნობს.

"აიტი გულისხმობს, პროგრამული უზრუნველყოფით დაწყებული ნებისმიერი ციფრული პროდუქტის დამზადებას. რაც შეეხება საზღვაო სერვისებს, ეს იქნება გემის გაქირავება ეკიპაჟით და უეკიპაჟოდ; რეისის დაგეგმვა და ანალიზი; გეგმის ფიზიკურ მდგომარეობაზე ზედამხედველობა შესაბამისი ტექნიკური ნაწილებით ან საკვები პროდუქტებით მომარაგება; ინსპექტირების ჩატარება დარგის მარეგულირებლის მოთხოვნის შესაბამისად და ასე შემდეგ", — განაცხადა ივანე მაჭავარიანმა.

მინისტრის თქმით, დაბეგვრის რეჟიმში კომპანიებისთვის შეღავათიანი არის 5 პროცენტი გადასახადი და 5 პროცენტი საშემოსავლო ნებისმიერ დაქირავებულ მუშაკზე.

"არსებობს დამატებითი ხარჯების ნუსხა, რომლითაც საერთაშორისო სტატუსის მქონე კომპანიებს შეუძლიათ, შეამცირონ მოგების გადასახადი. არის ორი ტიპის ხარჯი — პირველი, საქართველოს მოქალაქე რეზიდენტი დაქირავებული პირისათვის გადასახდი ხელფასის ხარჯი კომპანიებს შეუძლიათ, სრულად გამოქვითონ. მეორე — საერთაშორისო კომპანიისათვის ნებადართული საქმიანობის სფეროში სამეცნიერო კვლევითი, საპროექტო და საცდელ-საკონსტრუქციო მომსახურების ხარჯები, ე.წ. არენდის ხარჯები, ამით შეუძლიათ მოგების გადასახადი შეამცირონ", — აღნიშნა მინისტრმა.

იმისთვის რომ კომპანიამ საერთაშორისო კომპანიის სტატუსი მიიღოს, უნდა აკმაყოფილებდეს შემდეგ მოთხოვნებს — ჰქონდეს აღნიშნულ საქმიანობებში არანაკლებ 2 წლის გამოცდილება; შეიძლება იყოს არარეზიდენტი, თუმცა მასაც უნდა ჰქონდეს მინიმუმ, ორი წლის გამოცდილება.

კომპანიებს სტატუსის მინიჭებაზე განაცხადის გაკეთება შეუძლიათ შემოსავლების სამსახურში, რის შემდეგაც მთავრობა განიხილავს და გადაწყვეტს სტატუსის მინიჭების საკითხს.