ყირგიზეთში არჩევნების შედეგებით უკმაყოფილო მოსახლეობამ თეთრი სახლი დაიკავა, სადაც პარლამენტი და პრეზიდენტის ადმინისტრაციაა განთავსებული. 6 ოქტომბრის ღამეს დემონსტრანტებმა ჭიშკარი შეამტვრიეს და შენობაში შევიდნენ.

დილისკენ თეთრ სახლში ხანძარი გაჩნდა.

პრეზიდენტის კაბინეტი

ფოტო: Bakyt Torogeldi / Twitter

აქციის მონაწილეების ნაწილი ეროვნული უსაფრთხოების კომიტეტის შენობისკენ დაიძრა. მათ ექს-პრეზიდენტი ალმაზბეკა ატამბაევი და ყოფილი პრემიერები საპარა ისაკოვი და ჟანტორო სატიბალდიევი გაათავისუფლეს. ყველა მათგანი კორუფციის ბრალდებით იყო გასამართლებული.

როგორც ადგილიდან კორესპონდენტები ამბობენ, დემონსტრანტებმა კომიტეტის შენობის კარები სატვირთო მანქანით გაარღვიეს. მილიციამ კი წინააღმდეგობა არ გაუწია, მათთან ხელებაწეული გავიდა და უთხრა, რომ "ხალხთან ერთადაა".

ოპოზიციაში აცხადებენ, რომ სახალხო მთავრობის ჩამოყალიბებასა და ახალი პრემიერმინისტრის არჩევას აპირებენ. ამის შესახებ პარტია ატა მეკენის ლიდერმა, ჟანარ აკაევმა განაცხადა. დემონსტრანტები ასევე აპირებენ გადააყენონ პრეზიდენტი სოორონბაია ჟეენბეკოვი. თვითონ პრეზიდენტმა განაცხადა, რომ ზოგიერთმა ძალამ ქვეყანაში გადატრიალების მოწყობა და ძალაუფლების ხელში ჩაგდება სცადეს.

ბიშკეკში დაპირისპირება 5 ოქტომბერს დაიწყო, როცა საპარლამენტო არჩევნების წინასწარი შედეგები გახდა ცნობილი. არჩევნებში მონაწილე 16-დან 12-მა პარტიამ შედეგები არ აღიარა და ხელისუფლება არჩევნების ფალსიფიკაციაში დაადანაშაულა. დემონსტრანტების წინააღმდეგ მილიაციამ ცრემლსადენი გაზი გამოიყენა.

დაპირისპირების შედეგად ბიშკეკში 590 ადამიანი დაშავდა და ერთი დაიღუპა. 150-მდე ადამიანი კი დაზიანებებით კლინიკებშია მოთავსებული.