ევროკავშირმა წუხილი გამოთქვა, რომ საქართველოს პარლამენტი არ დაელოდა ვენეციის კომისიის დასკვნას, ისე შეიტანა ცვლილება უზენაესი სასამართლოს მოსამართლეების შერჩევის წესში. ინფორმაცია ევროკავშირის გვერდზე გამოქვეყნდა.

აღსანიშნავია, რომ აღნიშნულ ცვლილებებში არსებული ხარვეზების გამო ევროკავშირმა და სხვა დამკვირვებლებმა არაერთხელ გამოთქვეს შეშფოთება.

გავრცელებულ განცხადებაში ნათქვამია, საქართველომ ამ თემასთან დაკავშირებით განსახილველად თავად მოითხოვა ვენეციის კომისია და დასკვნა სულ რამდენიმე დღეში ცნობილი გახდება. მათივე თქმით, ამ ნაბიჯით საქართველომ თავადვე გაუშვა შანსი, რომ საზოგადოებაში აღნიშნული თემის მიმართ ნდობა გაჩენილიყო.

ევროკავშირი კანონმდებლობასა და მის შედეგებს ვენეციის კომისიის დასკვნის მიხედვით შეაფასებს და იმედოვნებს, რომ საქართველო რეკომენდაციებს გაითვალისწინებს.

უზენაესი სასამართლოს მოსამართლეთა შერჩევის პროცესში ცვლილებების შესახებ კანონპროექტი პარლამენტმა 30 სექტემბერს მიიღო.

აღნიშნული კანონი იუსტიციის უმაღლეს საბჭოს ავალდებულებს, დაასაბუთოს უზენაესი სასამართლოს მოსამართლეობის კანდიდატებთან დაკავშირებით მიღებული გადაწყვეტილებები, კანდიდატს კი მიღებული გადაწყვეტილების გასაჩივრების შესაძლებლობას აძლევს.