რა ასოციაციები გიჩნდებათ სიტყვა ჰოლივუდზე? რა თქმა უნდა, მთელი ამერიკული კინოსამყარო, კალიფორნია, ლოს-ანჯელესი, ბევერლი ჰილსი და მრავალი სხვა, თუმცა ამ ყველაფერს ერთი და იგივე სურათი გასდევს ჩვენს გონებაში - ცნობილი წარწერა Hollywood. ალბათ, ბევრ ადამიანს გააკვირვებს ის ფაქტი, რომ სულ ცოტა ხნის წინ ამერიკული კინოინდუსტრიის მთავარი სიმბოლო უცნობმა პირებმა Hollyweed-ად გადააკეთეს.

როგორც ლოს-ანჯელესის პოლიციაში ამბობენ, ვანდალიზმის აქტი სათვალთვალო კამერებმა დააფიქსირეს და დამნაშავეებს სულ მალე დაიჭერენ.

წარწერის გადაკეთება კალიფორნიაში 8 ნოემბრის საპრეზიდენტო არჩევნებზე მარიხუანას ლეგალიზაციის შესახებაც ჩატარებულ გამოკითხვას ეხება, რომელზეც ამომრჩეველთა უმრავლესობამ მხარი მის ლეგალიზაციას დაუჭირა, თუმცა ფედერალური კანონმდებლობის მიხედვით ის ჯერ ლეგალიზებული არ არის.

ჰოლივუდის ლეგენდარული წარწერა 1923 წლის 13 ივლისს გამოჩნდა და თავიდან უფრო გრძელი იყო (HOLLYWOODLAND). წარწერა ახალი საცხოვრებელი რაიონის სარეკლამო კამპანიას ემსახურებოდა და მხოლოდ წელიწად-ნახევრის განმავლობაში უნდა ყოფილიყო აღმართული. შემდეგ ლოს-ანჯელესის მუნიციპალიტეტმა მიიჩნია, რომ ეს სიტყვა სწრაფად განვითარებადი კინემატოგრაფის სიმბოლოდაც გამოდგებოდა, ამიტომ გიგანტური ასოების მოვლა-პატრონობა ქალაქმა საკუთარ თავზე აიღო. ტყეში შემალული სიტყვა ბრენდად გადაიქცა, როცა მას ბოლო ოთხი ასო ანუ LAND მოაშორეს.

აღსანიშნავია ისიც, რომ წარწერასთან მიახლოება ტურისტებსაც ეკრძალებათ. ტერიტორია შემოსაზღვრულია და 24-საათიანი ვიდეოთვალთვალი მიმდინარეობს. ჯერჯერობით უცნობია, როგორ მოახერხეს იქ შეღწევა უცნობმა პირებმა, რომლებმაც წარწერა შეცვალეს.