საერთაშორისო ორგანიზაცია, რეპორტიორები საზღვრების გარეშე (RSF) საქართველოს ხელისუფლებას მოუწოდებს, რომ ჟურნალისტებზე თავდასხმის ფაქტი გამჭვირვალედ გამოიძიოს და მოახდინოს პასუხისმგებელი პირების იდენტიფიცირება. ასე გამოეხმაურა ორგანიზაცია მარნეულში დაშავებული ჟურნალისტების საქმეს და მთავრობას დროული რეაგირებისკენ მოუწოდა.

"ჟურნალისტს უნდა შეეძლოს საარჩევნო კამპანია ისე გააშუქოს, რომ თავდასხმის სამიზნედ არ იქცეს, ხოლო სახელმწიფო ვალდებულია, უზრუნველყოს მათი უსაფრთხოება", — ვკითხულობთ RSF-ის მიერ გავრცელებულ განცხადებაში.

ორგანიზაციის თქმით, 2020 წლის საპარლამენტო არჩევნებამდე 4 კვირით ადრე მსგავსი შემთხვევების აღკვეთა და დამნაშავეების დასჯა აუცილებელია.

29 სექტემბერს, მარნეულის მუნიციპალიტეტში მთავარი არხის ჟურნალისტს თავს დაესხნენ. დაპირისპირება მარნეულში ქართული ოცნების და ერთიანი ნაციონალური მოძრაობის წევრებს შორის მოხდა და ჟურნალისტების გარდა, აქტივისტებიც დაშავდნენ.

ბოლო პერიოდში პარტიები ხშირად ადანაშაულებენ ოპონენტებს თავდასხმასა და პროვოკაციის მოწყობაში. როგორც ერთიანი ნაციონალური მოძრაობისა და ევროპული საქართველოს წარმომადგენლები აცხადებენ, მმართველი გუნდის მხრიდან მათზე ზეწოლა ხორციელდება, რასაც ქართულ ოცნებაში უარყოფენ.

გაიგე მეტი: