ნატოს გენერალური მდივნის, იენს სტოლტენბერგისა და პრემიერმინისტრ გიორგი გახარიას შეხვედრის შემდეგ მხარეებმა მოახლოებულ, ოქტომბრის არჩევნებზე ისაუბრეს.

"ჩვენ იმედი გვაქვს, რომ არჩევნები საქართველოში საერთაშორისო სტანდარტებით ჩატარდება, ეს მნიშვნელოვანია, როგორც საქართველოსთვის ასევე ნატოსთვის. საქართველოს პარტნიორობა ყველასთვის, ჩვენთვის უსაფრთხოების გარანტია", — განაცხადა იენს სტოლტენბერგმა.

გიორგი გახარიამ ნატოს გენერალური მდივნის წინაშე საქართველოს სახელით დაადსტურა, რომ ყველაფერს გააკეთებს არჩევნების დემოკრატიულ და სამართლიან გარემოში ჩასატარებლად.

"ეს იქნება კიდევ ერთი წინ გადადგმული ნაბიჯი ქვეყნის კონსოლიდაციისკენ. შემდეგი ნაბიჯები იქნება ნატოსთან ურთიერთობის გაღრმავება პოლიტიკურ განზომილებაში", — განაცხადა გიორგი გახარიამ.

ნატოს გენერალური მდივნის, იენს სტოლტენბერგისა და საქართველოს პრემიერმინისტრის, გიორგი გახარიას შეხვედრა ბრიუსელში, ნატოს შტაბბინაში შედგა.