ბორატი ბრუნდება და თანაც კიდევ უფრო ამბიციური და სასაცილო გეგმებით.

ამაში მაშინვე დარწმუნდებით, როცა საშა ბარონ კოენის 2006 წელს გამოსული ცნობილი კომედიის სიქველის სათაურს გაიგებთ: ბორატი — პორნომაიმუნის საჩუქარი ვიცე-პრეზიდენტ მიხაელ პენსს ყაზახეთის ახლახან დასუსტებული ერის სასარგებლოდ.

რამდენიმე დღის წინ ცნობილი გახდა, რომ ბორატი 2-ის გადაღებები დასრულდა, სულ ახლახანს კი მისი სახელწოდებაც გასაჯაროვდა: უკვე ფილმის სატესტო ჩვენებები მოეწყო.

კინოსაიტ Collider-ის ცნობით, პირველი ფილმის წარმატების გამო ფილმის მთავარი გმირი ბორატი მეორე ნაწილში ამერიკელ მოქალაქეებს ღიად ვეღარ გაესაუბრება, ამიტომ ცდილობს თავისი ვინაობა დაფაროს.

აგვისტოში ფილმის გადაღებებიდან, რომელიც ლოს-ანჯელესში მიმდინარეობდა, რამდენიმეწამიანი ვიდეოც გავრცელდა:

საშა ბარონ კოენი ამ ცნობილ კომედიაში, რომლის გრძელი სახელწოდებაც ასეთია: ბორატი — ამერიკის კულტურული გამოკვლევა ყაზახეთის სახელოვანი ერის სასარგებლოდ, პირველად 2006 წელს გამოჩნდა და მალევე დიდი წარმატება მოიპოვა. ფილმი მომგებიანი აღმოჩნდა კინოგაქირავებაშიც: $18-მილიონიანი ბიუჯეტით $262 მილიონის შემოსავლებს მიაღწია.

პირველი ფილმი გამოგონილი ყაზახი ჟურნალისტის, ბორატ საგდიევის შესახებ მოგვითხრობს, რომელიც აშშ-ში მოგზაურობს და ადგილობრივებთან ინტერვიუების საშუალებით დოკუმენტურ ფილმს იღებს.

Film Stage-ის ინფორმაციით, მეორე ნაწილში აქცენტი კორონავირუსის პანდემიაზე იქნება, ამავდროულად კი დონალდ ტრამპისა და ჯეფრი ეპშტეინის მეგობრობასაც შეეხება. ეს უკანასკნელი ცნობილი ამერიკელი ფინანსისტი იყო, რომელიც ათეულობით არასრულწლოვანის მიმართ სექსუალური ძალადობისა და სექს-ტრეფიკინგში მონაწილეობის ბრალდებით გაასამართლეს.

ჯერჯერობით უცნობია, თუ როდის შედგება ფილმის პრემიერა, თუმცა თუ გავითვალისწინებთ იმას, რომ საშა ბარონ კოენი თავისი პერსონაჟის ამპლუის გარეთაც ხშირად გვანებივრებს როგორც კრიტიკული შეფასებებით, ისე კომიკური ქმედებებით, წინ ნამდვილად დაუვიწყარი სანახაობა გველოდება.